La editorial asturiana Ediciones Radagast dio anuncia a entamos d’esti mes de que taba acabante de firmar una llicencia internacional pa llevar al rol la popular novela ucrónica de George Orwell “nineteen eighty-four” (1984), cosa que va asoceder col nome de “1984: Thoughtcrime”. El xuegu de rol va salir a mecenalgu na so versión inglesa a lo llargo d’esti añu y más sero, si tien éxitu, sacará otres dos ediciones n’asturianu y castellán. D’esti mou, “1984: Thouhgtcrime” va ser la primer llicencia internacional llevada al rol n’Asturies y n’asturianu.
Ediciones Radagast cuenta pa esti proyeutu con un equipu integráu por traductores, escritores y la ilustradora Fátima Acaso, autora tamién de la portade de Del Llau del Nigromante, otru llibru de la editorial Radagast. Ye xustamente la portada de Fátima Acaso lo único que trescendió agora d’esti proyeutu que ta en “fase de desendolcu”.
El llibru va contar con trés partes bien distintes: Una parte dedicada al “lore” o toles coses que formen parte del mundu qu’imaxinare George Orwell, otra parte na que van tar recoyíes les regles de “1984: Thoughtcrime” y una tercera onde habrá hestories preparaes pa facer y personaxes prediseñaos colos que xugar direutamente. El conxuntu del xuegu va tener un aire solombriegu, na idea orixinal d’Orwell, y va contar con mecanismos y regles pa representar nel xuegu de rol conceutos como l’Hermanu Grande, les telepantalles, la presión social, el fanatismu o’l “doblepensar”.
La novela 1984 de George Orwell ta disponibe n’Asturiau dende 2019 na coleición Calume de la editorial Ediciones Trabe, frutu del trabayu del traductor Xesús González Rato y que pue mercase equí.
