Yá sabíemos que Marvel diba espublizar una serie nueva d’El planeta de los simios, franquicia qu’hasta apocayá taba al cargu d’una editorial bastante más pequeñina, Boom! Studios. Y ye que, dende que Disney compró Fox, son yá delles les sagues que tán pasando a manes de Marvel, de la que tamién ye propietaria, como foi’l casu d’Alien o Predator. Y lo mesmo pasara yá cuando comprara LucasArts, y les series d’historietes tresvasáronse de Dark Horse a la Casa les Idees.
El casu ye qu’agora la cosa con Fox ponse seria, porque dieron un golpe na mesa pa dexar claro qu’estes series nueves nun van quedar somorguiaes pente tolos títulos de superhéroes que salen cada mes. Les trés van facer parte d’un sellu nuevu, como va indicase na portada, llamáu “20th Century Studios Imprint”. ¿Ye solo un cambéu estéticu? La cosa pinta a que non, porque C. B. Cebulski, editor xefe de Marvel, anuncia que “pronto van tener l’honor d’espandelu (el sellu) los próximos meses”.
¿Y qué series nueves podemos esperar nesti sellu? Lo primero y más cenciello sedría afondar nel universu AvP, con un títulu p’Alien Versus Predator (idea que ñació nos cómics, anque dempués se tornara películes) o pa Prometheus (la precuela d’Alien de 2012). Pero les posibilidaes nun acaben ehí nin p’atrás, porque Fox tien abondes propiedaes intelectuales: Avatar, Buffy the Vampire Slayer, The X-Files, Die Hard, The Simpsons y Futurama son solo unes cuantes d’elles. ¿Cuála sedrá la primera? De dalguna d’estes mentaes tán yá espublizando cómics otres editoriales (o pelo menos teníen los drechos pa ello va pocos años), pero yá dicimos qu’eso nun foi nengún problema en pasáu.
En tou casu, pronto vamos gociar (n’España unos meses más tarde y llamentablemente namás en castellanu, per parte de Panini) de la serie nueva de Predator d’Ed Brisson (Old Man Logan) y Netho Díaz (Legion of X), que sal n’EEUU yá esti mes de marzu. Y n’abril de la nueva d’Alien de Declan Shalvey (Time Before Time) y Andrea Broccardo (Deep Beyond) y de la de The Planet of the Apes de David Walker (Naomi) y Dave Watcher (Teenage Mutant Ninja Turtles).
Dexámosvos darréu coles portaes.
