Por Blanca Fernández
Yá pasaron 25 años desque los dos primeros videoxuegos de Pokemon salieran Xapón. Naquella dómina yeren daqué anovador, que surdió gracies a Satoshi Tajiri y Ken Sugimori, col nome orixinal de Pocket Monsters, un xuegu empobináu a la consola portátil Game Boy. Naide nun esperaba qu’aquello fuera l’entamu d’una de les sagues más conocíes de videoxuegos.
¿Qué ye y qué son los Pokemon?
Magar la bayura de tola saga nun hai qu’escaecer cuála ye la esencia del xuegu: entrenar pokemon y vencer a los líderes de ximnasiu p’algamar la Lliga Pokemon de la to rexón y ser el campeón. Esto va acompañao de rexistrar nun aparatu, que se llama Pokédex, tolos pokemon que vas atopando, vencer a entrenadores y a los villanos del xuegu (nos primeros xuegos el Team Rocket) y dir pasando desafíos pa llegar a toles partes de la rexón.
Los pokemon son criatures, nel sen más grande d’esta pallabra, porque atopamos desde pokemon asemeyaos a animales (Ratata, Pidgeot) o plantes (Oddish, Trevenant) hasta pokemon que se paecen a oxetos o armes (Voltorb, Magnemite). Tamién hai dellos de los que solos hai ún, los que conocemos como pokemon llexendarios, en cada rexón distintos, y que tienen que ver cola historia de caún de los xuegos. Na primer saga había 151 pokemon, agora hai yá 802.
Amás, estos pokemon tienen distintos tipos, como pue ser normal, fueu, agua, planta, llétricu, síquicu, volador,…estos tipos van aumentando colos nuevos xuegos. El tipu inflúi cuando vas facer combates contra otros entrenadores y tienen más efeutu o menos. Al entamu de casi tolos xuegos dante a escoyer ente un de tipu fueu, planta o agua.
Los xuegos
En Xapón orixinalmente salen dos títulos, nel añu 1996: Pokemon Verde (con Venusaur de portada) y Pokemon Colloráu (con Charizard de portada), a los que se xunió más tarde’l Pokemon azul. Fuera de Xapón salen solo el Pokemon Azul y el Pokemon Colloráu, con delles meyores. Estos son los que lleguen tamién a España, y tamién el Pokemon Mariellu, un poco distintu no que cinca a la historia. Esta ye la conocida como primer xeneración.
Dempués d’esta vienen otres xeneraciones, que van sumando nueves criatures que consiguir, dellos títulos, que seguro que vos suenen, d’estes xeneraciones son el Pokemon Oru, Plata y Diamante; Pokemon Zafiru, Rubí y Esmeralda; Pokemon Diamante y Perla; Pokemon Blancu y Pokemon negru;…hasta llegar a la cabera edición, Pokemon Espada y Pokemon Escudu. Estes ediciones salieron en distintes consoles de Nintendo: Game Boy, Game Advance, Nintendo DS, Nintendo Switch,…
Tamién hai dellos xuegos con dinámiques diferentes de xuegu, como ye’l Pokemon Stadium, Pokemon Pinball o’l Pokemon mundu misteriosu.
Pokemon más allá de los xuegos
L’éxitu de Pokemon ye talu que hai toa una mena de productos venceyaos a la saga, como ye’l casu del merchandising: camisetes, llaveros, moñecos,…de los pokemon más conocíos de la saga, álbumes de cromos, auriculares y hasta ediciones especiales de les consoles y mandos. En Xapón hai varies cafeteríes temátiques inspiraes na saga y per tol mundu hai tiendes oficiales, Pokemon Center, onde pues atopar merchandising llimitáu.
Magar que nel llanzamientu los dos primeros xuegos de Pokemon nun tuvieron muncha acoyida pola so orixinalidá, col pasu los meses fueron algamando popularidá y un añu dempués salió un anime (una serie animada) que contaba la so historia. Esti anime sigue n’emisión y va casi al empar que los xuegos que van saliendo, y tamién hai delles películes.
Amás, tamién hai un xuegu de cartes, que va sumando ediciones según van saliendo los videoxuegos y del qu’hai torneos nacionales y internacionales.
Nun paez que l’universu Pokemon vaya pasar de moda,..y tu, ¿xugasti dalgún xuegu de Pokemon?
