Mickey7, lo nuevo de Bong Joon-ho:
El direutor de la esitosa película coreana Gisaengchung (Parásitos) prepara pa Warner una obra nueva, esta vegada de ciencia-ficción, que va tar basada nuna novela tovía non espublizada d’Edward Ashton. Cuenten que’l protagonista va ser Robert Pattinson, y que tien el llabor de colonizar un planeta xeláu llamáu Niflheim (el mundu del fríu y la borrina na mitoloxía nórdica).
Primer güeyada a la serie d’El Señor de los Aniellos:
La que va ser la serie más cara de la historia yá tien nome, The Rings of Power, y empiecen a enganosar con unes primeres imáxenes. Nun ye muncho, una forma guapa d’amosar el títulu y un poco d’introducción narrativa, pero si queréis podéis ver qué pinta tien equí. Nun vos esmolezáis, que según salgan más coses vamos dir informándovos, poques gracies.
Serie nel “monstruuversu”:
L’universu en comuña que Legendary creó coles películes de Godzilla y King Kong, el llamáu monsterverse, va tener una serie n’Apple TV, magar qu’endagora yera HBO la canal la que llevaba los sos productos a la televisión. Cuenten que va centrase nuna familia que sufre les consecuencies de qu’heba pehí monstruos xigantes que s’engarrien y destruyen ciudaes, y tamién nos secretos de la organización qu’anda persiguiéndolos, estudiándolos y que sal en toles películes de la franquicia, Monarch.
