Nun principiu’l públicu allegróse cuando Marvel decidió recuperar el Daredevil de la serie de Netflix. Charlie Cox fizo un caméu curtín como Matt Murdock en Spider-Man: No Way Home, y depués tuvo un protagonismu bastante relevante na serie She-Hulk. Sicasí, yera la prometida serie Daredevil: Born Again la que diba amestalu pela puerta grande al Universu Cinematográficu Marvel, llevando amás como sotítulu el de la saga más importante pal personaxe nos cómics.
Por embargu, va tiempu que les cóses-y anden fallando a la compaña, sobre manera col fracasu estrepitosu de crítica y públicu de la so última serie, Secret Invasion, magar costar doscientos millones de dólares y contar nel repartu con estrelles como Samuel L. Jackson o Emilia Clarke. Esto ye, amás, un síntoma más d’unos cuantos que tán sufriendo de lo que paez una fartura de superhéroes per parte de los espectadores, y que nun solo afecta a Marvel (tamién ta’l fracasu tremendu de DC con Blue Beetle, y que cancelaren la estrena y hasta eliminaren de los discos duros la película inédita de Batgirl). La noticia nueva, anque nun garra dafechu por sorpresa porque despidieron a los guionistes en setiembre, ye que Kevin Feige (presidente de Marvel Studios) nun ta nada contentu colo que teníen grabao de la serie de Daredevil (que yera muncho) y agora deciden refacela.
Polo que se cuenta, yá que nun hai accesu al material que diba estrenase, la serie yera “demasiao d’abogaos”, demasiao distinta en tonu a la serie de Netflix y el vixilante de Hell’s Kitchen nun ponía’l traxe de diañu hasta nada menos que’l cuartu episodiu. Conque a estes altures tán buscando guionistes y directores nuevos, que-yos arreglen lo que puean pero al empar aprovechando episodios y escenes yá grabaos pa reducir costos. Esto tamién traye consigo una novedá pa Marvel, que ye que van facer vezu de contratar “showrunners“, como yá ficieron en She-Hulk y que ye dalgo normal n’otres productores, yá qu’asina nun acaben alcontrándose de sópitu tol pastel yá cocináu cuando nun hai remediu y ta too pago.
