Yá va años que se tien esperimentao con teunoloxíes nueves col envís de facer más encerriscante la esperiencia audiovisual, y ún de los caminos que s’abren ye’l d’añader un sentíu nuevu: l’olfatu. Y masque amunchayá ye ún de los trucos que gasten los llamaos cines 4D, amás d’otros como echar fumu o mover de sópitu les butaques, ye agora cuando podemos tener l’inventu en casa.
La empresa Aromajoin acaba de presentar, nel CES 2023, un aparatu capaz d’echar más de cien arumes distintos combinando dellos básicos, y que pue configurase pa sincronizase col vidéu o videoxuegu pa que cada escena tenga un arrecendor distinto. Na páxina AromaPlayer proponen, por casu, una configuración pa Cyberpunk: Edgerunners qu’incluye arume a café, menta, clavu, carambelu y fumu, o una pa One Piece con sandía, bruselar negru, xel pal pelo, naranxa sangrina y tierra llento.
L’únicu problema ye que, de momentu, el traste cuesta cuasi mil dólares, y los cartuchos de repuestu más de cincuenta caún.
Ye verdá qu’anguaño resulta, como poco, una escentricidá, pero yá tán trabayando n’aplicalo a la realidá virtual. Y si la cosa va con gafes, guantes de tautu y toes eses coses, amesta-y a too golores pue facer d’ello una esperienca entá más ablucante.
