Ye probable que tovía recordéis la fuelga de guionistes norteamericanos de 2007, más que nada porque, ente los atrasos y les sustituciones por guionistes cuasi amateurs, la cosa nun acabó mui bien pa munches de les series que s’emitíen. Un casu de los más sonaos foi’l de Heroes, con una final de temporada pillada con pinces y de la que nun consiguió nunca remontar. El resultáu pa la industria audiovisual foi desastrosu, pos se calcula que les perdes que sufrió California por ello foron de más de dos mil millones de dólares.
Agora, dalgo más de quince años depués, llega esta nueva fuelga indefinida del Sindicatu de Guionistes d’América que fai tremer a les productores, y tamién a los fans por más que tean d’alcuerdu colo xusto de les sos reivindicaciones. Consideren, los guionistes, que les formes nueves de consumu de productos audiovisuales, sobre manera el streaming, tán precarizando les sos condiciones, y piden ente otres coses recibir, talamente como los actores, regalíes cuando los productos lleguen a medios nuevos o trunfen n’audiencia.
¿Y qué significa eso pal espectador? No tocante a les series, yá sabemos que lo más seguro ye que sufran atrasos, pelo menos, la quinta y postrera temporada de Stranger Things, la sesta y tamién última de Cobra Kai, la tercera de Yellowjackets (de la quagora tán sacando la segunda), la serie d’animación Big Mouth, Saturday Night Live o Abbott Elementary. Y ye de suponer, por supuestu, qu’a la llista van dir sumándose otres, según vaya allargándose la protesta. Per otru llau, House of the Dragon confirma que, anque ensin guionistes nel set, yá que los de HBO Max s’unen a la fuelga, va rodar la segunda temporada ensin interrupciones, pos yá tien tolos guiones acabaos.
El casu ye, ¿fadrá esta fuelga que cayan series, como pasó cola anterior? Ye dalgo que tovía nun sabemos, pero de lo que vamos informavos en cuantes que lo sepamos
