Abel Martínez ye l’autor de “Vikingos 2035”, una novela post-apocalíptica que vien a sumase a un xéneru qu’hasta agora trabayare cuasi n’esclusiva Dolfo Camilo nes lletres asturianes. La propuesta de Martínez llévanos a una Asturies afarada pola guerra y la enfermedá na que los pocos supervivientes qu’hai organícense nes ruines de lo qu’un día foi L.luarca. D’esta novela ambientada na Villa Blanca falamos col Autor, que ta trabayando en milenta coses más.
Llevabes 10 años ensin sacar nada depués d’unos cuantos de producción importante. ¿Por qué agora?
Siempre me prestó escribir, pero por una serie de circunstancies dexelo un poco de llau, y depués centréme muncho na radio, que ye otra de les mis pasiones. Siguí escribiendo cosines, unes pa leer n’antena, un relatín en castellanu que publicó Lomarca ediciones, una editorial malagueña. Y poco más, de fechu dexé de presentame a concursos lliterarios o de mandar coses a editoriales.
La cosa ye que, años depués, entamé a ver noticies per internet tocantes a una editorial nueva n’asturianu, que trabayaba los xéneros que más me prestaben: la ci-fi, la fantasía, el terror… curiosamente los xéneros nos que me teníen publicao dalgunes cosines cuando mozu: “L’Aventura de Mhino”, “La Maldición de Llucescuria” y “Unos cuentos de muerte”, y metióme gana de volver a escribir. Lóxicamente toi falando d’Ediciones Radagast, a la que presenté esta novelina, cola suerte de que-yos gustó y decidieron publicala.
¿Qué espera al llector en “Vikingos 2035”?
Una historia que, fundamentalmente, espero que seya prestosa, guapa de lleer, y d’eses que cuando llees un poco entren ganes de lleer más.
Ensin estripar l’argumentu, pueo dicir que lo que lo que va topar quien la llea ye una utopía distópica, o a lo meyor una distopía que torna n’utopía pa volver dempués a distopizase un pocoñín. Y a lo meyor hasta pue dicise que ye un poco de terror, o d’angustia, porque lo que pasa ehí pue pasar mañana, y nun diba ser prestoso. Pa nun quita-y a naide les ganes de llela puedo adelantar que’l final ye razonablemente ¿feliz?… o polo menos allivia la tensión
Una de les coses que vemos na novela ye una comuna anarquista: ¿Ye una novela anarquista? ¿Una crítica a esti sistema?
Cuido que tanto como un llibru anarquista nun pue dicise que seya, que nin ye un ensayu nin tien nenguna intención alleicionadora. Cenciellamente al imaxinar cómo podríen arreglase ente elles les persones sobrevivientes a un eventu catastróficu, ye eso lo que salió. Supunxi que cuando l’orde regular de les coses desapaez de sópitu, la manera más afayadiza de facer por salir d’ello, probablemente, nun diba ser volver a lo d’enantes, sinón tratar de facer les coses d’otru mou.
Ye verdá que lo más clásicu nes más de les histories distópiques a les que tamos fechos, ye que presenten situaciones violentes, nes que medren el totalitarismu y la llei del más fuerte, escenarios “madmaxistes”. Yo quixi afuxir d’ello, porque nun hai nengún motivu pa pensar qu’esa seya la única posibilidá.
la llei del más fuerte, escenarios “madmaxistes”: nun hai nengún motivu pa pensar qu’esa seya la única posibilidá.
Va unes selmanes asoleyaba un artículu La Nueva España sobre’l boom de la fantasía y la ciencia ficción n’Asturies nos últimos años. Tu yes miembru de la tertulia lliteraria L’Aruelu. ¿Cómo tas viendo esti movimientu?
Teniendo en cuenta que, como llector, son los mios xéneros favoritos, y que, como aficionáu a escribir, resulta que tamién, yá pue imaxinar cualquiera que toi encantáu.
No que cinca a la mio participación nel Aruelu, permitióme conocer a un montón de persones que comparten unos gustos lliterarios y una visión de la lliteratura n’asturianu mui averada a la mía. Tán en marcha un cientu de proyeutos prestosísimos nesti ámbitu nos que toi mui agradecíu por poder participar.
En Radagast fálennos de “proyeutos coleutivos” ente dellos autores. ¿Tas metíu en dalgún d’estos? ¿Por qué paez que cuesta tanto escribir a comuña?
Sí, y ye la primer vez que lo faigo, asina qu’a ver cómo sal la cosa.
Nun sé por qué cuesta a otres persones, pero nel mio casu la mio manera d’escribir ye mui anárquica, de normal tengo dos o tres idees xenerales, póngome a teclear, y va saliendo. Lóxicamente cuando tas coordinao con más xente, eso nun pue ser, hai que llindase más al proyeutu.
¿Y la lliteratura asturiana, cómo la ves en 2023 en rellación a va 10 años?
Nada que ver, préstame muncho más agora. Nun hai más que lleer les respuestes anteriores: salen munches más coses nos xéneros que me presten, y hai muncha xente que tien interés por escribir coses prestoses.
Voi poner un exemplu, y ye que conozo xente que nunca nun se plantegara lleer n’asturianu, pero títulos como “La Rexenta contra Drácula”, o fechos como ver un western n’asturianu, llamáron-yos tanto l’atención que ficieron l’esfuerzu.
“conozo xente que nunca nun se plantegara lleer n’asturianu, pero títulos como “La Rexenta contra Drácula”, o fechos como ver un western n’asturianu, llamáron-yos tanto l’atención que ficieron l’esfuezu”
¿En qué tas trabayando agora mesmo?
Seguru que en más coses de les que voi ser quien, pero tiempu a frenar va haber. Fundamentalmente toi arrincando con Vikingos 2036, que yá me la reclamaron unos cuantos, en dalgún d’esos proyeutos coleutivos de los que falábemos, nuna historia lovecraftiana, dalgún cuentín ci-fi… Y na cabeza tengo tentar de facer dalgo qu’avere la lliteratura n’asturianu a les persones con discapacidaes. Prestábame escribir daqué en llectura fácil (pa persones con dificultaes de comprensión), mirar a ver de pasar a audiollibru Vikingos 2035…
Pues mercar “Vikingos 2035” calcando nesti enllaz.
