La FEA, la Feria de la Edición Asturiana, arrancó ayeri na Plaza Trascorrales, Uviéu, cola participación d’una trentena d’editoriales. Ente los eventos programaos alcuéntrense meses redondes, sesiones de firmes y presentaciones, y, no tocante a la fantasía y la ficción científica, ayeri pudimos esfrutar de la presentación de Vikingos 2035, nueva novela utópico-distópica d’Abel Martínez.
Nella, l’autor faló de cómo se plantegó la novela como una alternativa a los futuros “madmaxistes” que se dan en xeneral nes hestories posapocalíptiques, imaxinando una manera nueva d’organización que nun tenía por qué ser peor y más bárbara que l’actual. Tamién se faló de la cercanía que se produz al ambientala en Ḷḷuarca (“el mundu nun tien qu’acabase siempre en Denver o n’Ohio”, comentó l’editor Nicolás Bardio) o de por qué se presenta la sociedá posapocalíptica tan cercana nel tiempu; “lo que cuento equí podría pasar mañana mesmo”, comentó l’autor. Tamién apuntó a que yá ta trabayando nuna segunda parte, Vikingos 2036.
Güei, a les 16:30, tamién presenta la so novela de fantasía xuvenil, El roble azul, l’autor Dam Fernández, xunto al renomáu autor Rodolfo Martínez. Mañana a les 15:00 preséntase tamién El xuegu d’Ender, la traducción al asturianu de Xesús González Rato de la clásica novela d’Orson Scott Card.
