Ayeri, ocho de setiembre, principió la campaña de Verkami pa sacar alantre’l xuegu de cartes La Guerra La Xoya, tanto n’asturianu como en castellanu. Nes partíes van poder participar de dos a seis xugadores, yá seya de manera individual o n’equipos, encarnando caún una de les trés faiciones en guerra. El mecanismu sedría asemeyáu al del clásicu xuegu de cartes del “culu”, como adelantra l’autor Pablo M. Testa nel portal La Montera Solitaria (podéis velo vós mesmos calcando equí), pero amás hai cartes especiales que representen, por casu, espíes. Sedríen, cuenta, partíes curties y aptes tanto p’avezaos a xuegos de mesa como pa novatos, masque sí aconseyen una edá mínima de doce años.
El xuegu promete, amás, ser l’escomienzu d’una serie de productos ambientaos nel mesmu universu, tando yá en fornu otru xuegu más, con mayor complexidá (con, arriendes de cartes, narrativa, tableru y figures) y dos noveles.
La edición cuerre a cargu d’Acuto Xuegos, empresa que yá tien sacao unos cuantos xuegos dende 2019 y que, con esti, sigue aumentando’l catálogu y enanchando’l públicu potencial al que se dirixe.
Y dexámosvos yá l’enllaz de la campaña (calcando equí), nun seya qu’acabe’l plazu y quedéis ensin él.
