El Sindicatu de Guionistes de los Estaos Uníos llega a un alcuerdu colos estudios de Hollywood, lo que paez un avance na vuelta a la normalidá tres nada menos que cientu cuarenta y cinco díes de parón (la segunda fuelga más llarga depués de la de 1988, que foi de poco más, cientu cincuenta y ocho). Y ye que con ella consiguieron, ente otros llogros, una meyora salarial, un aumentu de cotización pal seguru y la xubilación y que nun s’usen programes d’intelixencia artificial pa escribir nin pa reescribir guiones. Por embargu, los actores sí que siguen cola fuelga, colo que de momentu nun van volver los rodaxes… y agora, a ellos, puen amestase amás los actores de voz de videoxuegos.
Y ye que’l llabor de los actores de voz nun ye solo imprescindible pal doblaxe, qu’amás de que se suel menospreciar (yes más intelectual si ves les películes en versión orixinal) nos Estaos Uníos nun ye cuasi siginificativu, y la xera onde daveres son imprescindibles ellí ye nos dibuxos animaos y nos videoxuegos, sobre manera teniendo en cuenta que davezu primero graben al actor y, yá depués, faen l’animación de manera qu’encaxe con ello (o, como ye más común col 3D, al empar que la voz faen la catura de movimientu).
El Sindicatu autoriza agora la so fuelga, conque si les negociaciones que se tán dando nestos mesmos momentos con Activision-Blizzard, WB Games, Insomniac Games, Epic Games y Take-Two Interactive (ente otres) nun son favoratibles pal gremiu podemos esperar qu’escomience pronto una fuelga. Ello, por supuestu, podría suponer l’atrasu de videoxuegos mui esperaos (ún de los que más se comenta que podría sufrilo ye Marvel’s Wolverine, en manes d’Insomniac tres l’ésitu del de Spider-Man). Y ello diría venceyao, claro, a perdes millonaries per parte de les grandes compañes.
