La polémica coles imáxenes creaes con intelixencia artificial ta dafechu abierta dende l’añu pasáu (anque yá paez un sieglu), tratándose custiones daveres interesantes como si verdaderamente ye arte lo que fai una máquina y lo discutible de qu’estes depriendan con imáxenes que tienen drechos d’autor. L’últimu episodiu tien que ver colo asocedío col mangaka Rui Araizumi (conocíu sobre manera por ser el dibuxante de Slayers), pero nun ye tan cenciella como podría paecer. Metieron la pata bien fondo.
A principios d’esti mes, Rui espublizó y presentó na Comiket 102 un llibru con ilustraciones suyes d’Oniichan wa Oshimai! (de títulu internacional n’inglés ONIMAI: I’m Now Your Sister!) y Hepburn: Kidō Senshi Gandamu: Suisei no Majo (Mobile Suit Gundam: The Witch from Mercury). Hasta ehí, nengún problema. Pero dellos usuarios de redes (más concretamente, de X) pensaron qu’alcontraren nesti dibuxos nos que l’autor tenía emplegao programes de xeneración d’imáxenes por intelixencia artificial. Les acusaciones espardiéronse como pólvora, y foi por ello que l’autor tuvo de xubir un vidéu nel que muestra’l so procesu de creación, capa a capa, pa probar que nun hai programes que-y faen el trabayu pel mediu.
Asina, paez que la caza del tramposu se-y foi de les manes a les redes sociales, onde davezu l’acusáu ha demostrar la inocencia en cuenta d’al aviesu,. Y esto demuestra, tamién, lo cerca que ta yá la intelixencia artificial de la mano del home, pos hai tracamundios nuna direición y n’otra. Dexámosvos el vidéu del autor calcando equí, y tamién equí embaxo delles imáxenes del so procesu.
