Adrián Carbayales (Madrid, 1985) ye l’autor del primer videoxuegu n’asturianu, Tiempu de Lleendes, un xuegu fechu col programa RPG Maker MV que recuerda muncho nos gráficos, nes dinámiques de combate y nos diálogos a aquellos primeros Pokemon.
Tiempu de Lleendes llévanos a Ḥiria, un llugar máxicu y fantásticu que discurrió’l propiu autor y que tien presencia de la mitoloxía asturiana y d’otros elementos propios de fantasía. El xuegu recaldó en Verkami más de 1.700 euros pa facelu posible.
¿Qué vamos atopar en Tiempu de Lleendes?
Ye un videoxuegu de corte clásicu, con muncho de RPG xaponés, colos típicos combates a turnos, pero tamién dalgo d’aventura gráfica de los noventa. Ye verdá que los gráficos nun son d’otru mundu, pero punxi procuru en qu’otres coses tuvieren cuidaes al máximu. Hai interaición con cuadros de diálogu al calcar en cuasi tolos oxetos y personaxes, misiones secundaries, fabricación d’oxetos y decisiones que determinen los poderes que garra’l personaxe y cómo termina’l xuegu.
L’humor ye una parte fundamental del xuegu, ¿puedes desplicanos por qué o ponenos dalgún exemplu?
Bono, la verdá ye qu’entemecí munches coses al respeutive. Per un llau, hai munchu d’humor asturianu que namás va entendese equí: un puntu denomáu “pisapraos”, o una pintada na muria’l castiellu que diz “Resplandiu nun tien reina”. Per otru, xuego muncho colos anacronismos al facer que los oxetos máxicos mui avanzaos nun se distingan de la teunoloxía del sieglu XXI, lo que choca bastante con que’l restu del mundu ye bastante tradicional no que ye ambientación medieval-fantástica. Y llueu tamién ta Xandria, que, amás de bastante faltosa, ye a romper la cuarta muria y falar cola persona que ta xugando. En dalguna ocasión hasta hai dalgún testigu que queda plasmáu y entrúga-y a quien se dirixe. Nun taba ciertu de qu’esi mecigayu fora a funcionar, pero los beta testers respondieron mui bien.
¿A qué públicu ta empobináu?
Ye too mui inocente, conque podemos dicir que tien la recomendación pa tolos públicos. Pero tamién ye verdá que pol tipu de xuegu, igual non mui llamaderu pa la xente más mozo, pienso qu’onde pue tener más ésitu ye ente millennials señardosos. Pa facelo baséme nos xuegos que me facíen más feliz de ñeñu, conque me paez probable que coneute meyor colos de la mio xeneración.
¿Por qué un xuegu de fantasía y non d’otra temática? ¿Ye la fantasía’l xéneru que manda n’Asturies?
Bono, en realidá ye’l xéneru que manda en tol mundu. De les cincuenta películes más recaldoses, sedrán de fantasía unes cuarenta. Y les otres son, polo xeneral, bastante fantasioses. La fantasía, entendiéndola nun sentíu ampliu, ye lo que crea’l “fenómenu fan” que llueu permite vender moñequinos, camisetes y eses coses, porque la historia presta y marca a la xente. Pa que la llingua asturiana tenga un verdaderu impautu cultural precisamos un George Lucas, non un Lars von Trier. Y taría mui bien tener tamién un Lars von Trier, por supuestu y oxalá lu tuviéremos, pero eso ta mui lloñe de ser una prioridá.
Amás de creador de Tiempu de Lleendes, yes autor de la esitosa novela La Rexenta contra Drácula y ún de los organizadores de l’AsturCON. ¿Vamos ver un espaciu de videoxuegos asturianos de fantasía y ciencia ficción na AsturCON dalgún día?
Prestaríame, pero nun lo veo realista anguaño. Nun me gusta xeneralizar dende los casos individuales que conozo, pero dame la impresión de que polo xeneral Asturies tamién esporta los sos talentos nesta estaya. Por supuestu, si toi equivocáu pido que me lo fagan saber, puen contautar con cualesquiera de la organización y vamos tar encantaos de face-yos un sitiu.
Como dicíemos, ye un videoxuegu fantásticu. Ún de los temes que se tocaron na AsturCON foi xustamente’l cómo integrar la mitoloxía asturiana de tola vida na fantasía moderna. ¿Cómo lo fixisti tu? ¿En qué s’estrema d’otros autores o noveles asturianes?
Bono, pienso que lo que marcó l’enfoque foi los recursos colos que contaba. Facer un videoxuegu ún solo nun ye una xera cenciella, y pa facilitala trabayé con un bancu d’imáxenes, anque modifiqué unes cuantes col poco arte que tengo pal dibuxu. Por exemplu, tenía claro que quería meter trasgos, y pa ello usé ñeños con oreyes puntiaes. Los malos son moros, pero moros de los mitolóxicos, nun s’entienda mal, y fícilos como una especie d’elfos drow coles colores al aviesu. Y llueu había creatures típiques de los xuegos xaponeses qu’aproveché p’adautar a la cultura asturiana. A los típicos slimes, monstruos d’agua bien fáciles de vencer, convertílos en “babayinos”. Los güercos, qu’en Xapón nun sé por qué represéntenlos con aspeutu de gochu, convertílos en “góchidos”, foscos, puercos y con un llinguaxe propiu que pues deprender pa comunicate con ellos.
¿Dalguna creatura marca de la casa y que nun podamos trazar na mitoloxía asturiana o n’otres?
Unos cuantos. Ente los testers fizo muncha gracia l’arañocla, un monstruu que fici retocando la imaxe d’una araña y qu’ataca n’alta mar.
¿Ye un videoxuegu fácil? ¿Cuántes hores de xugabilidá mos da Tiempu de Lleendes?
Nos combates procuré que yo, sabiendo cuálos son los ataques que manquen más a cada monstruu, nun tuviera dificultá pa pasame’l xuegu, conque cuido que’l nivel ye apropiáu pa que dacuando se sufra, pero tol mundu seya a acabalu. Sobre les hores, nun tengo más datos que los míos, pero sabiendo al milímetru tolo qu´había que facer tardé nueve hores, conque calculo que dará pa unes venti. Hai xuegos AAA que lleven menos.
¿Va poder mercase en Steam? ¿Qué preciu va tener?
De momentu ta solo disponible pa los mecenes, pero sí, el plan ye llevalu pronto pa una o dos plataformes dixitales. Va costar un pelín más, eso sí, porque habrá que sumar el porcentaxe que lleven estes.
Dícennos que facer novela ye rentable. ¿Ye rentable facer videoxuegos nuna llingua minorizada como la nuesa?
El xuegu llevóme cuasi ochocientes hores, y quitando gastos gané menos de dos euros caúna. En proporción a cada hora emplegada yá gané más perres namás colos drechos de la primer edición de La Rexenta contra Drácula. Evidentemente, nun ye rentable desendolcar videoxuegos n’asturianu, y anque punxi tol amor del mundu nel videoxuegu, sabiendo que yera necesario facelu, he aparcar la idea de facer más, pelo menos de momentu.
¿Y cómo podría afalase dende lo público la creación de productos culturales n’asturianu?
Cuando empecé a desendolcar el videoxuegu entrugáronme, nuna entrevista, si me paecería positivo que tamién salieren sovenciones pa ello, como pa la lliteratura n’asturianu. Naquella nun lo pensé muncho y dixi que sí, pero cada día toi menos convencíu de que les sovenciones seyan una solución, pelo menos como midida principal. Si yo cobrara de mano por facer el videoxuegu, paezme que fadría más lo que me petara a min, dende la mio individualidá y ensin pensar no que pue prestar al públicu potencial. Total, si van pagate igual, ¿qué más te da?
Agora hai un mercáu emerxente de productos n’asturianu, munchos empiecen a ser rentables, y pueque haya qu’empezar un tratamientu distintu a tener siempre l’idioma enchufáu a la máquina de soporte vital. Parte de la rehabilitación ye facer al paciente llevantar de la siella ruedes, que camine un ratín, anque seya garráu a les barres. Pienso qu’hai qu’impulsar los productos culturales que meyor funcionen en mercáu, facer a la cultura n’asturianu enfrentase a la realidá, anque nun principiu seya con ayuda, pa qu’un día seya a caminar sola. L’oxetivu final de la política llingüística ha ser consiguir qu’un día dexen de facer falta les sovenciones, non que la industria s’afaye nelles.
Entós, ¿qué solución ves?
Pienso que pue ser una opción lo que se propunxo va unos meses pa los mozos, el bonu cultural. Podría ser l’últimu pasu del procesu, un tiempín como transición pa la rehabilitación total del asturianu. En cuenta de sovencionar les obres qu’un comité d’espertos anónimos alcuentre deseables, que seya la propia xente lo que decida cuálos son los productos n’asturianu que-y interesen. Y si hai a quien nun-y interesen pos nun pasa nada, eses perres queden pal gobiernu y non en caxes de llibros apoliyaos.
