Magar les bones crítiques que ta teniendo Ahsoka, l’audiencia nun acompaña la serie nueva de Star Wars. Y nun ye que Disney nun tea faciendo esfuercios, pos a la estratexa habitual de sacar un episodiu a la selmana, col envís de que se tea meses falando d’ella en redes, amiesta nesta ocasión que la estrena nos EE.UU. se produz n’horariu de prime time, no que ye un pasu más nel estrañu fenómenu de que la televisión en streaming imite les canales tradicionales. El casu ye que nun paez funcionar bien, pos según los númberos asoleyaos por Samba TV anda mui asemeyada a Andor, la qu’hasta agora yera la serie de la franquicia con menos ésitu. Pa que vos faigáis una idea, el primer episodiu d’esta tuvo un millón doscientos mil espectadores nos primeros seis díes, mientres que la más esitosa, Obi-Wan Kenobi, consiguió’l doble en cinco.
Yá va tiempu que Disney tien decidío nun sobreesplotar les dos franquicies más importantes que tien, Star Wars y l’universu Marvel, pero les producciones son tan costoses, non solo en dineru sinón tamién en tiempu, qu’una montonera de proyeutos s’acumulen y la inercia nun permite echar el frenu. Hasta Liam Neeson, qu’interpretó al míticu Qui-Gon Jinn, comentó apocayá que tantos productos faen que la saga pierda la so maxa, faciendo perder l’interés polo que sal nuevo porque siempre sal dalgo nuevo. Hai tamién quien echa la culpa del pocu ésitu a qu’Ahsoka ye un personaxe ñacíu na película d’animación Star Wars: The Clone Wars, habitual de la serie del mesmu nome, de Rebels y de Tales of the Jedi, que tien un caméu n’aición real nel Episodiu IX y otros en The Mandalorian y The Book of Boba Fett… Yá enantes d’estrenar la serie andaben rulando per Internet llistes bien llargues de programes qu’había que ver primero pa saber quién ye’l personaxe, xugando l’universu compartíu y l’intentu de crear hype a la contra de la producción en cuenta d’a favor.
Seya como seya, anque la cosa pinta a que van dexase de sacar tantes series al añu, dexámosvos l’avance d’Ahsoka calcando equí, por si sois de los despistaos que tovía nun vieron qué pinta tien.
ACTUALIZACIÓN: Nun comunicáu, Disney tresmite que les informaciones de Samba TV sedríen falses, y que les visualizaciones d’Ahsoka na primer selmana sedríen d’un total de dieciséis millones, convirtiéndose na serie más esitosa de la franquicia con tantísima diferencia que vamos esperar a confirmar la información.
