Tienen retrasao la salida del xuegu pa que nun lu pisen otres grandes estrenes que salíen mui siguío, pero yá queda poco más d’un mes pa que tengamos ente manes (nun sentíu metafóricu, pos namás va tener edición dixital) el xuegu pol que llevamos esperando trece años. Alan Wake 2 llega y promete una nueva hestoria d’horror de la que vamos ser los sufridores protagonistes. Y nesta ocasión falamos en plural porque tenemos un personaxe nuevu, l’axente del FBI Saga Anderson, que tamién vamos usar pa esplorar el siniestro pueblu de Bright Falls. Una esploración, per otru llau, que, como podemos ver nel gameplay acabante salir, va ser más fonda que na primer entrega, pos pinta a que vamos poder interactuar bastante colos paisanos mientres que na hestoria orixinal yera cuasi too dir pel monte y matar solombres.
Per otru llau, la confianza del estudiu nel videoxuegu ye grande, pos yá tienen planiao pelo menos dos espansiones de pagu que nun van tardar en salir, Night Springs y Lake House, asina como tamién conteníu de baldre.
Salíu en 2010, Alan Wake marcó época con una hestoria n’episodios, al estilu de serie de televisión, na qu’encarnamos a un escritor bloquiáu que viaxar cola muyer a un pueblín pa ver si ellí arranca. Pero entós la muyer desapaez, y la realidá y la ficción creada por Wake empiecen a entemecese.
Dexámosvos el gameplay calcando equí. Pero cuidáu, que mete mieu.
