Depués d’entrevistar a Aymara González la selmana pasada y como anunciemos nel so momentu, consagramos esti mes d’agostu a facer una serie d’entrevistes posaes con muyeres asturianes de menos de 40 años que tán actives nel campu de la lliteratura y la cultura asturianes. Nesta ocasión entrugámos-y a la profesora de secundaria Alba Carballo, escritora n’asturianu y ganadora de dellos premios.
Hay una desigualdá nel númberu de muyeres y homes con obra publicada n’asturianu. ¿Por qué pienses que pasa eso?
Creo qu’hai una tendencia a tomar al home como referencia lliteraria -n’asturianu y n’otres llingües, ye una cuestión social xeneralizao- Nesti sen, sí, hai una desigualdá ente muyeres y homes con obra publicada, como tamién hai desigualdá n’autores con renome y popularidá.
¿Onde crees que ta l’orixe de la desigualdá? ¿Nel númberu de muyeres qu’escribe en rellación a los homes qu’escriben, o nel númberu de muyeres que publiquen en rellación a los homes que publiquen?
Véolo más uma cuestión de publicar obra o de promocionala. Munchísimes muyeres escriben, pero son menos les que publiquen.
Anque non n’asturianu, hai estadístiques n’otres lliteratures que dicen que les muyeres lleen tanto a homes como a muyeres pero los homes nun lleen a muyeres. ¿Date la impresión de que ye asina nel casu asturianu? ¿Por qué?
Sí considero que yera lo más normal: que los homes lleyeren homes (poro, de renome) y les muyeres tuvieren unos intereses de llectura más variaos. Agora mesmo, nos homes más mozos nun se ve tanto esi rechazu a la lliteratura escrita por muyeres y creo que cada vez va ganándose tarrén -anque quede muncho per delantre-.
Nel to casu, ¿Qué ye lo que más te frenó de cara a escribir o a publicar? ¿Qué eches en falta?
Los xuicios de los escritores más consolidaos dientro de les lletres asturianes y el rechazu qu’a vegaes hai pa cola xente mozo.
¿Por qué te paez que, inclusive en concursos con paridá home-muyer nos xuraos, sigue pasando que mayoritariamente ganen homes?
Fadría falta facer un estudiu cuantitativu, pero considero qu’hai munchos más homes que se presenten a concursos que muyeres (a les que paez que se-yos cede más tarrén namás na lliteratura infantil, ¿Siguimos xuniendo a la muyer cola maternidá? ¿Ye porque esi ye’l so campu y entós ehí sí tienen güecu?
¿El llibru escritu n’asturianu que más te prestó escritu por una muyer?
El llibru póstumu de Sherezade
¿Qué te paez que pueden facer les editoriales pa iguar esta situación?
Esparder y apostar pola lliteratura escrita por muyeres de toled edaes.
¿Y los poderes públicos?
Una cuantía mayor de sovenciones, convocar más concursos, apostar pola variedá
¿Vivisti dalgún tipu de discriminación como autora n’asturianu pol fechu de ser muyer? ¿Cuála?
Non
