Cola llegada de la seronda, entamen tamién a conocese los ganadores de los premios más prestixosos de la lliteratura asturiana: Cómic, ensayu, infantil y xuvenil, novela, poesía y teatru. En Refuelgu propunxímonos entrevistar a tolos ganadores – sí se dexen – y el primeru al que convencimos y que se fixo col primer gallardón foi Alberto Vázquez: Dibuxante, documentalista y un home comprometíu cola causa de la llibertá y la democracia.

Alberto Vázquez ganó’l XII Premiu de Cómic n’Asturianu Alfonso Iglesias con “El sol na escombrera” 2020. Nun ye la primer vez que lu gana, pos fíxose cola victoria va trés años con “Los llazos coloraos”. Trátase d’un llibru que fala d’un neñu de la guerra al que manden en 1937 a la Unión Soviética.

¿Qué mos pues contar de “El sol na escombrera”? ¿Qué va atopar el llector?

El sol na escombrera sí, va de un neñu de la guerra, pero ta ambientau n’ Asturies. Son les memories de José Fernández Sánchez, Cuando el mundo era Ablaña. Él foi un neñu de la guerra, pero éstes son les sos memories de la so infancia hasta que garra’l barcu pa Rusia. La etapa rusa escribióla n’otru llibru, Mi infancia en Moscú. Ye que muncha xente piensa pola prensa que ye un cómic sobre los neños de Rusia y nun ye eso. Esti cómic va de la Asturies d’anantes de 1937.

Resumiendo, va atopar la forma de vida nun pueblu mineru na década de los años 30 del sieglu 20. La mina, la fábrica, dir al molín, dir a segar, dir a la fonte, dir al cine, los xuegos infantiles… Too eso mecío colos acontecimientos políticos: la llegada de la República, el 34, el 36, cómo yera un Primeru de Mayu…

Llama l’atención la semeyanza temática ente dambos cómics: Guerra civil, fuelgues mineres, una dómina na qu’Asturies yera industrial… Unos temes que tamién se ven muncho nel cine español ¿Qué ye lo que te llama d’aquel tiempu?

Hai que discutir esi términu de “guerra civil”, daquella llamábenlo la Guerra contra la Invasión. Rechazo’l términu “Guerra Civil”. Claro que la cosa acabó en una guerra civil en ciertos sitios, en rivalidades de tipo civil en provincies o pueblos determinaos. Pero foi una invasión de nazis, fascistes italianos, mercenarios marroquinos, facistes portugueses, facistes rumanos, facistes irlandeses,… El términu “guerra civil” ye pa exonerar de culpa a les democracies europees pola so non intervención. Esi términu de “guerra civil” cura la culpa d’Europa, duermen tranquilos agora. Y favorez a Franco, llexitima a Franco, paez que ganó una guerra él y el so bandu ensin Hitler nin Mussolini. Si alguien usa esi términu agora ye un atrasu. Ye tramposo. El términu afayadizu diba ser “Guerra d’España”.

D’aquel tiempu me llama que hubo una serie d’opotunidaes de cambiar el mundu, o que la xente decidió cambialu. Lo que vivimos agora vien directamente de tola corrupción del franquismu y d’una transición que ye la perpetuación d’aquello… ¿Democracia con una monarquía? Ye de risa. Y depués hai un problema sobre derechos humanos n’España… basta dicir qu’hai 150.000 persones nes cunetes. Una democracia construida sobre eses cunetes nun ye democracia, una democracia sin atender a les víctimes del facismu nun ye democracia, una democracia con rei nun ye democracia, una democracia onde´l gobiernu nun pue baxar la tarfifa la lluz nun ye democracia…

Los llazos coloraos ye’l llibru n’asturianu más vendíu de 2020 acordies col reportaxe de Refuelgu, con dos ediciones y más de 400 copies vendíes. ¿Cómo te sientes énte esti ésitu? ¿Qué prespeutives tien un artista te poder “vivir de lo d’él”? ¿Ye factible la profesionalización?

Nun tengo noticies d’esi ésitu asina porque sí. Fartuqué de facer actos hasta que s’agotaron los exemplares. Actos que yo organizaba. Nun se vendió solu. Nun se pue vivir d’eso. El premiu nun supunxo encargos extra (yo esperábalo), falo d’encargos d’ilustraciones de cuentos o prensa, cartelos… nada. Pa min nun ye factible la profesionalización. Podría ser una tira cómica diaria na prensa… Nun sé. Hai que pregunta-yos a los que les publiquen. O Ruma Barbero tien más experiencia que yo pa contestar a eso, Ruma llegó a autoeditase dellos cómics y ye más reconocíu y tien más trayectoria.

¿Cómo ves la lliteratura y los cómics que tán faciéndose n’Asturies anguaño? ¿Pienses qu’hai más nivel que va años? ¿Qué cómic n’asturianu recomendaríes? ¿Cuálos -asturianos o de fuera – t’inspiraron más?

¿Lliteratura n’asturiano? La verdá que cuasi sólo lleo lo que escriben amigos y amigues como Laura Marcos o Xuan Santori. Nun pueo facer un analís más p’allá. Llevo munchu tiempu que cuando garro un llibru ye un llibru d’hestoria o de les memories de dalgún lluchaor antifranquista, pa documentame. ¿Cómic n’asturianu? Ruma Barbero, Igor Medio… De fuera d’Asturies pueo citar autores recurrentes nel asuntu del cómic y la memoria… Ye un rollu face una llista: Jacques Tardi sobre la primera guerra mundial, Joe Sacco sobre Palestina… Nun me gusta facer llistaos d’artistes, siempre te queda xente guai fuera.

¿Cómo ye’l procesu creativu d’un cómic? ¿Cuántu tiempu lleva crear un cómic dende qu’entames hasta que lu remates?

Depende. N’El sol na escombrera el textu nun lu fixi yo, ye de José Fernández Sánchez, y nesti casu fui rápidu de manera relativa. Tien 80 páxines tardé 5 meses. El primer mes lleí’l llibru y piquélu (o seya, pasélu a ordenador), los cuatro meses que siguieron fueron asina: Cada llunes escoyía 4 o 5 capítulos (los primeros que visualizaba en viñetes) del llibru y dexaba trazao’l diseñu, la planificación, la distribución de viñetes y testos. Intentaba facer 4 o 5 páxines a la selmana.

Nel casu de Los llazos coloraos tardé creo que 20 meses. En dellos episodios yá tenía organizada la info polos documentales que yá yo fixere o por llibros o por otros documentales, pero tuvi qu’entrevistar más xente y completar muncha información y dar muncho la vara a dellos y delles historiadores.

Otra cosa que faes amás de cómic, son documentales que tien nesta canal. ¿Veslo como dalgo separtao o complementario? ¿Qué ye lo que te motiva a facer una o otra cosa?

Pue haber veces que si considero que tal documental nun tuvo la repercusión suficiente… lu paso a cómic. Lo importante ye esparder la idea d’insurxencia. Mostrar los exemplos de persones que nun mos aprendieron na escuela. Falar de los exemplos d’antifacismu olvidaos. Pue ser complementario. Mira qué guapo pudiera ser un cómic hestóricu acompañáu de un DVD onde vieres y sintiéres falar a los protagonistes de coses que nun salen nel cómic, o a historiadores nun DVD que faigan una serie d’introducciones, o un DVD con documentos y semeyes,… O too xunto. ¿Por qué non? Otros formatos qu’afiten la obra… Dalgunes ediciones últimes de los cómics de Corto Maltés tienen más de 30 páxines d’introducción histórica con textos, semeyes, grabaos, dibuxos… A mi me prestaba facer cómics lluxosos con DVDs, obres lo más completes posibles, pero eso ye caro. Lo que me motiva a facer una o otra cosa ye la posibilidá d’esparder la idea nun campu o otru, ente un públicu o otru, la rentabilidá que se puea sacar, la oportunidá X, el momentu o la propuesta X. Lo mesmo te digo esto que lo contrario. Hay coses que voi facer en plan personal, anque seya pa min y cumplir col compromisu míu sentimental y personal con ciertes lluches y ciertes persones. Pero otros trabayos deben ser rentables. Los ayuntamientos, les instituciones deben pagar proyecciones de cine asturiano, mercar DVD’s o yo qué sé, la tele pública tien que poner cine asturiano y pagar… Sinón esto ye insostenible.

¿Qué proyeutu tienes ente manes agora?

Un documental sobre l’asturianu Vicente García Riestra nel campu nazi de Buchenwald. Anque ye un documental que va más allá d’esi campu nazi porque tien más caminos: los sos viaxes a Asturies pa buscar el llugar d’enterramientu del so hermanu, el so llabor nes escueles colos estudiantes, les sos opiniones sobre la monarquía y les víctimes del franquismu, les sos opiniones sobre los refuxaos y la xubida de la ultraderecha… Nesi documental participen otros tres supervivientes del campo qu’entrevisté va años y Xuan Santori qu’ escribió un llibru sobre Vicente: 42.553. Depués de Buchenwald.

Leave a Reply

La to direición de corréu nun va espublizase. Los campos riquíos márquense con *