En 1984 estrenóse una película que pasó a la historia y quedó grabada nos nuesos corazones: Karate Kid. Nella, un ñeñu que sufría bully deprendía kárate, yde pasu, el so sensei, Miyagi, tamién-y ayudaba a madurar. Tuvo trés continuaciones, y una serie bastante recién, Cobra Kai, que ta teniendo munchu ésitu. Nella, l’entonces alumnu (y los sos rivales) son agora los maestros.
Per otru llau, en 2010 ficieron un remake de la película orixinal, que siguió llamándose Karate Kid magar que cambiaren el kárate pol kung fu, y en cuenta d’a Pat Morita faciendo del maestru Miyagi en Los Angeles, teníamos a Jackie Chan como Mister Han en Pekín. D’esa nun hubo continuaciones, pero agora vienen con esta sorpresa: dambes dos hestories asoceden nel mesmu mundu, y tán preparando una película na que se van cruciar.
Sobre la historia, guarden muncho secretu. Sabemos que los personaxes van alcontrase na Costa Este de los EEUU, y que, por supuestu, va tener esi toque d’aprendizaxe pa la vida xuncíu al de les artes marciales. Nun sabemos, siquiera, quién sedrá’l “kid” (o los “kids”) a los que los maestros van enseñar, porque los de les películes y hasta los de la serie van tar un poco mayorinos pa siguir llamándose asina. Veremos.
Dexámosvos l’enllaz a tan sorpresivu anunciu calcando equí. La fecha d’estrena anunciada sedría pa dientro d’un añu, el trece d’avientu de 2024.
