De mano, he dicir que nun tengo lleío’l manga nel que se basa la serie, y anque pienso qu’esta ha poder xulgase por sí mesma, nun me presta dafechu facer una reseña ensin saber cuálos son los elementos propios de la obra orixinal, y cuálos los encalcuzaos na adautación, yá qu’esto me permitiría, pienso, entender meyor el porqué de los sos fallos y aciertos. Dexando esto nun aparte, voi espresar delles impresiones que me produxeron la primer y la segunda temporada d’Alice in Borderland.
La primer temporada, masque anterior a Squid Game, munchos conocímosla y sirviónos pa satisfacer les ganes de ver más xuegos mortales de la mesma mena. Saber quién vive y quién muerre, qué ta dispuestu a facer cada personaxe y cuála ye la fin espantible qu’espera a los que fallen. Si funcionaba colos gladiadores en coliséu, nun hai razón pa que nun nos encante velo en sofá. Y eso ye lo que presta de la serie, qu’a mediu camín ente l’isekai (xéneru, davezu de manga, nel que los personaxes han adautase a un mundu nuevu) y el survival, preséntanos unos mozos, a los que-yos falta pelo menos una patatina, y que, de sópitu, alcuéntrense solos na ciudá, como si tol mundu menos ellos desapaecieren. Ceo, alcuentren qu’hai más xente perdío como ellos, y que si quieren siguir vivos, ensin qu’un láser que sal del cielu los altraviese, han participar nunos xuegos macabros nos que los perdedores muerren de formes espantoses. Conque la diversión ta sirvida, pos a partir d’ehí esfrutamos del sufrimientu de los personaxes, al empar que tentamos de pillar el truquín al xuegu y imaxinar dende la comodidá del salón qué fadríemos nós nel llugar d’ellos. De la primer temporada, he dicir, fízoseme llarga la parte de “La Playa”, pos como digo son los xuegos puros y duros lo que me fai gracia de la serie. Dacuando, tamién, poníense intensos, con conversaciones trescendentales, flashbacks nos que repasaben les sos vides ensin sentíu y unos silencios bien llargos, tan propios de la ficción xaponesa. Ello dába-y dalgo de fondura a la cosa, y tampoco ye que me molestara.
Nesta segunda temporada, por embargu, la verdá ye que sí que me molesta un poco. Pero sobre manera porque empiecen dexando los xuegos de llau, conque la balanza queda desequilibrada. Empezamos con un xuegu que nun ye un xuegu, ¡porque nun tien regles!, y al ablucamientu de los personaxes va xuncida la mio deceición. Por suerte sí vuelven los xuegos de verdá pal segundu episodiu, y resulta que son muncho más complexos, lo que permite imaxinar abondes estratexes si yes a siguir toles regles que ponen (cuando esplicaron la de dalgún tuvi de rebobinar pa volver a enterame bien de toes). Anque, pa mio idea, siguieron ocupando menor tiempu en pantalla del que me prestaría, y tamién da la immpresión de que rodaron too como una película y llueu separtaron los episodios con cronómetru y tisoria. Sí me prestó enforma que-y dieron a Chesire el protagonismu que merez, siendo’l meyor personaxe pola pachorra cola que ye a vivilo too, y con eso sí que nun tengo quexa. Tamién me paeció guapo’l clímax argumental, y al empar románticu, nel que los protagonistes han enfrentase a los sos mayores mieos.
Al respeutive de la final, y a partir d’equí hai spoilers, la verdá que me dexó un regustu amargu. Per un llau, nun me presta nada’l trucu de facer que maten a tou Dios d’una manera espantible y dramática, pa llueu al ratu mostrar que nun tán muertos, porque resulta que les firíes nun yeren pa tanto. Per otru, el descubrimientu de la verdá abúltame más bien floxu, y querdría más que quedara pa siempre’l misteriu. Que la grillada del últimu xuegu tomara’l pelo a los personaxes coles dos teoríes más espardíes ente’l públicu yera una manera graciosa de desmontales, y si la serie acabare colos fuegos artificiales, nun fundíu en negro al más puru estilu The Sopranos, yo quedara satisfechu. Esi epílogu tan… mundanal… Pienso que nun lu salva nin encalcuzar un truquín Inception (que, polo que lleí per ehí, ye un inventu de Netflix, y el comodín ye una especie de Caronte nes hestorietes).
En resultancia tamos énte una serie entretenida y con un conceutu más fántásticu, y en principiu más prestosu, que Squid Game, amás de con xuegos enforma más orixinales. Y, por embargu, el resultáu ye, pa mio idea, más desequilibráu.
