Alicia Álvarez forma parte del dúu “Pauline en la Playa” y, amás, ta detrás de bien d’iniciatives de “La Fabriquina”, como’l discu “Bestiariu”, que busca poner nel mercáu cantares adaptaos a los neños y neñes n’asturianu o, tamién, Kikirikí, otru album dedicáu a la reciella del que ta acabante de sacar nuevu videoclip

El Videoclip d’ “El Barquín”

Asoleyes un nuevu videoclip d’un cantar infantil. ¿Ven videoclips los neños?

Venlos muncho, sí,  porque los guaḥes agora viven nun entornu audiovisual mui potente, con munches  pantalles y dispositivos móviles dende los qu’acceder a la cultura y el entretenimientu, asina que’l videoclip ye mui bon formato pa llegar a la reciella.  

Esti cantar vien del proyeutu “Kikirikí: Canciones pa neñes y neños”; un llibru-discu con ilustraciones d’Alicia Varela y cantares d’Alicia Álvarez. ¿Sorprendióvos l’éxitu que ta teniendo?

Préstanos muncho ver como ta funcionando tolo que facemos dende La Fabriquina, porque son proyectos con munchu mimu, mui cuidaos y sobremanera, con munchu trabayu detrás. Nós somos un sellu independiente y tenemos poques ferramientes pa llegar al gran públicu, asina que ver qu’estos llibros o discos como Kikirikikí tienen ecu y algamen nueves ediciones, pa nós ye mui satisfactorio y un gran méritu.

Amás de cantares pa neños y neñes, tamién faes música p’adultos col grupu “Pauline en la Playa”. ¿Ye mui distinto abordar la xera de creación cuando facemos música pa neños o p’adultos?

Ye verdá que partes d’otru llugar. Pa min ye importante la vivencia personal a la hora de componer, lo que m’arrodia ya inspira, que siempre son coses cercanes, un costumismu emocional, pero sí ye verdá que nun ye lo mesmo contar eses coses  a un adultu qu’a un neñu. Yo colos críos siempre trato de pensar cómo entienden ellos el mundu y falar d’eses miemes inquietúes pero a traviés d’otros referentes, personaxes como los animalinos o la naturaleza pa poder allegame a los mesmos sentimientos.

En Kikirikí tolos temes tán n’asturianu y en Pauline en la Playa en castellanu. A la hora de componer música, ¿Ye más afayadiza una llingua pa unos xéneros determinaos?

Kikirikikí ye n’asturianu porque’l so orixe ta nos temes que compusi pa la colección BESTIARIU y  “Préstame pola vida” pal día de la Reciella. Cuando tuvi bastantes temes quixi siguir componiendo nesa llinea y paecióme que tenía más sentíu siguir faciéndolo n’asturianu, pero sí ye verdá que’l asturianu a min apórtame referencies domestiques, del llar, mui fuertes y una dulzura estra que creo que lo faen perfecto pa dirixise a los críos.

Amás de Kikirikí, onde ta inxertu esti tema y esti videoclip, tuvisti detrás de “Bestiariu”, el que quiciabes ye ún de los proyeutos pa neños más interesantes. Tais acabantes de sacar el terceru ¿Hai planes d’un cuartu? ¿Cómo ta siendo l’acoyida?

Esta colección ye mui especial pa nós ( David Guardado y yo). Cuando saquemos el primer discu acabábamos de tener a la nuestra fía y pensamos que prestaría muncho poder compartir música colos nuesos fios, enseña-yos tolo que se fai  n‘Asturies, lo rico y variao que ye en panorama musical  y amás, consiguir que fuera n’asturianu. Esa idea fuimos actualizándola con cada edición y ye daqué que queremos siguir desarrollando, pero agora tamos metios n’otru proyectu pa finales d’añu, asina que de momentu la cuarta parte de BESTIARU tendrá que esperar un poquiñín más.

¿Ye difícil entamar proyeutos como estos? ¿Cómo vos paez que tán respondiendo les alministraciones públiques?

Ye difícil porque coles ferramientes d’un proyectu d’edición independiente nun siempre te dexa llegar tolo lloñe que te gustaría. Les ayudes del Principáu son un emburrión, pero la promoción ye indispensable pa poder difundir la existencia d’esos productos, y ehí quiciabes ye onde echamos en falta una rede que ayude más a poder poner en circulación les coses que facemos.

Al marxe de la música. ¿Cómo veis la ufierta cultural qu’hai pa rapacinos y rapacines? ¿Paezvos afayadiza?

La ufierta pa los guaḥes ye mui grande. Agora na mayoría de les localidaes piensen na reciella a la hora de programar. Llueu hai munches llibreries, por exemplu, o collectivos que faen llectures o talleres animando a la imaxinacion. Lo qu’hai ye poca ufierta n’asturianu, eso cuesta más alcontralo.

Centrándonos na música asturiana: ¿Cómo veis el panorama actual?

Pos yo creo que tamos nun momentu mui bonu, con munchos artistes y grupos mui distintos tantu en castellanu como n’asturianu. Artistes consolidaos que sigue llanzando nuevos trabayos, grupos independientes, proyectos que revisen la música tradicional y tamién nueves propuestes mui interesantes. Ye una escena asturiana mui, mui rica y variada.

¿Qué más proyeutos tuyos vamos poder ver?

Agora toi trabayando nun nuevu proyectu que voi sacar otra vuelta con La Fabriquina y qu’espero que tea llistu pa finales d’añu. Nun quiero avanzar muncho, pero toi mui ilusionada con ello. 

Si queréis mercar “Kikirikí”, trabayu al que pertenez esti tema del videocpli, podéis facevos con él equí:

Leave a Reply

La to direición de corréu nun va espublizase.