Desque Disney compró Fox y, magar los mieos qu’esto provocó nos fans d’Alien y Predator, paez que la empresa nun quier desaprovechar nenguna oportunidá d’esplotar les franquicies. Y, pelo menos de momentu, ensin mete-y tisories pa faceles más pa tolos públicos como suel ser el so estilu.
Y ye que yá sabíemos d’una serie de televisión na que va unos meses que ta trabayando Noah Hawley (el creador de Fargo y Legion), ambientada nun futuru cercanu, na mesma Tierra, onde les coses van complicase cuando s’estrelle nuna gran ciudá una nave de la corporación (esperta en xenomorfos) Weyland-Yutani. Hai tamién, paez ser, una serie animada d’Alien vs. Predator, yá terminada y llista pa estrenase en cualesquier momentu, pero que (probablemente pola reestructuración que ta sufriendo Disney+) tán dexándola en barbechu, a la espera d’un momentu más afayadizu pa la estrena. Y tán, nun podemos olvidanos, los cómics de Marvel. L’anunciu recién d’una serie de Predator vs. Wolverine (contémosvoslo equí) paez indicar que pronto vamos tener más cruces ente franquicies, y Alien ye’l candidatu más probable pal siguiente.
Per otra parte, yá tenemos títulu y fecha pa la próxima película de la saga. Va llamase Alien: Romulus, y ta planificao que salga n’agostu de 2024. El direutor, Fede Álvarez (Evil Dead, Don’t Breathe) tien nella la xera d’anovar la saga, pa lo que nun pue contar col personaxe de la famosa teniente Ripley (nes continuaciones la so hestoria foi complicándose demasiao como pa siguila nun rellanzamientu) nin tampoco partir de lo contao nes últimes películes (Prometheus y Alien: Covenant), yá que, col refugu que provocaron, nun tien traza de ser un bon puntu d’iniciu. “Tenemos que volver a evolucionar y cambialo too”, diz Álvarez al respeutive.
Por embargu, la noticia que más ta moviéndose agora peles redes ye sobre’l videoxuegu que ta a puntu de salir, yá el martes viniente (pa PC, PlayStation y Xbox), y del que nos presenten un avance nuevu col que nos dexen ablucaos. Llámase Alien: Dark Descent, y nél vamos manexar un comandu de marines espaciales cola misión d’acabar con una infestadura nun planeta en cuarentena, y como nun podía ser d’otra manera vamos alcontrar nesti xenomorfos de tipos a esgaya. Y ye que’l lore de la saga crez en cada mediu, y agora les colmenes tienen de too: abrazacares, guerreros, corredores, pretorianos y la mesma reina, asina como tamién vamos topar androides y “guardianes”, cyborgs fanáticos y monstruosos que son a caminar ente xenomorfos.
A diferencia d’Alien: Isolation, que yera un survival horror, esti xuegu cambia dafechu de xéneru, y al manexar un equipu de marines conviértese nún d’estratexa táctica al estilu de XCOM… lo que nun quita que nun suframos pola tensión, claro.
Dexámosvos l’últimu avance del xuegu calcando equí.
