por Adrián Carbayales
Hai poques coses que nun tengamos visto nos cómics. Al aviesu de lo qu’ocurre n’otros medios como’l cine, nestos cuesta lo mesmo facer una obra costumista o la fantasía más vistosa y alloriada, asina qu’hai ciertu enclín por centrase no cabero. Sicasí, esti añu cúmplese un cuartu sieglu d’ún de los esperimentos más estrañosos que nunca nun se dio nes historietes, ún que quiciabes nun tien asemeyu dalu; non yá nel mundu la ficción, sinón en cualesquier productu a la venta. Por un poner, ¿daquién piensa que Coca-Cola y Pepsi sedríen a sacar xuntos un refrescu?
Ye verdá que Marvel y DC collaboraren más vegaes, faenlo cuando la rellación ente les compañes nun ye demasiao mala; en 1975 sacaron un cómic nel que s’axuntaben Superman y Spider-Man, en 1981 a Batman y Hulk, y dacuando repiten la fórmula pa sacar unes perres polo llamadero’l plantegamientu. Por embargu, en 1996 infiñéronse nun proyeutu ralu como nengún.
L’eventu escomenzó col cruz de personaxes más grande que nunca nun fixeron, llamáu a cencielles Marvel Versus DC. Nesti, cúntase que dos ximielgos, entes cósmicos enfrentaos dende siempres, diseñaron caún ún de los universos superheroicos, y nesa deciden facer que combatan los campeones de dambos dos mundos pa determinar quién d’ellos ye superior, y polo tanto qué universu va sobrevivir. Por supuestu, los campeones son los héroes más nomaos de les compañes, y engárriense ensin esforciase muncho por buscar otra solución primero. Pal eventu crearon tamién un personax nuevu, Access, un superhéroe que pue viaxar ente mundos y tienta de resolver el conflictu ensin que muerra ún de los universos. La cosa sal a medies y en resultancia fusiónense los ximielgos, los universos y tolos sos pobladores.
Darréu, dambes dos editoriales fúndaron un sellu editorial en comuña, Amalgam Comics, col qu’asoleyaron doce one-shots (títulos d’un solu númberu) protagonizaos por estos superhéroes fusionaos. Tuvieron tanto ésitu qu’asegundaron la iniciativa pal añu siguiente, sacando otros doce más. Tomando el proyeutu en serio tanto como en chancia, fixeron pasar los cómics polos primeros númberos de coleiciones reales, tremáronlos de referencies a pie viñeta que boquiaben otres series nunca non espublizaes (con nomes amestaos d’otres que sí) y fasta apunxeron una estaya pal corréu los llectores, nel que se facíen pasar por estos y escribíen cagándose na editorial por decisiones que supuestamente tomara, o falaben d’autores inesistentes que tamién entemecíen los nomes de los artistes orixinales. Munchos de los cómics acababen, amás, con una escena sorprendente y un “siguirá” que nun diba a nenyures.
Bono, pero, ¿qué heroes yeren estos, que ye menester dicir que dende entós son canónicos y viven na nomada Tierra-9602? Anque nun vamos entrar al detalle nos venticuatro númberos qu’hebo y tolos personaxes que salen nellos (podríemos escribir un llibru enteru tocántenes a ello), vamos con dalgunos de los qu’amiesten los personaxes más populares:
Dark Claw (Batman/Wolverine):
Cuando Logan Wayne vivía de neñu en New Gotham, un lladrón mató-y al pá y la ma. Entós foi a Canadá pa vivir con un tíu, y desgraciadamente tamién mataron a esti. Llueu de que lu críen les monxes, allístase n’exércitu canadiense y sométese al Proyeutu Arma X, nel qu’ente otres coses-y cubren la cadarma d’adamantiu pa convertilu nuna máquina matar. Años dempués torna a la ciudá na que naciera, y ellí conviértese nun artista reconocíu que peles nueches llucha escontra’l crime como Dark Claw. El so mayor enemigu ye Hyena (Joker/Sabretooth), otru voluntariu del Proyeutu qu’acabó dafechu alloriáu.
Esta foi una de les series más esitoses de la primer tanda, y na segunda asoleyaron otru cómic del personaxe, Dark Claw Adventures, supuestamente basáu nuna serie de dibuxos animaos y nel qu’inclusive’l dibuxu asemeya’l de les series de televisión de la época.
Super-soldier (Captain America/Superman):
Mientres la Segunda Guerra Mundial, científicos americanos usen l’ADN d’un cadabre estraterrestre pa crear un supersoldáu que seya a enfrentase a la Exa. El voluntariu pa que-y pinchen el sueru ye un mocín llamáu Clark Kent, y esto da-y unos poderes increyibles. Tres de combatir escontra los nazis, queda xeláu na mar y espierta cincuenta años dempués, onde tien que s’adautar a la vida moderna. El so mayor enemigu ye Green Skull (Red Skull/Lex Luthor), un empresariu que na Segunda Guerra collaboraba colos nazis y que sobrevivió fasta los años noventa inyectándose Green K, una sustancia que s’alugaba nel mesmu cohete que’l cuerpu estraterrestre y que-y tornó la piel verde.
Siendo otra de les series esitoses, decidieron asoleyar na segunda tanda Super-Soldier: Man of War, ambientada nos años cuarenta y que sirve de precuela al primer cómic.
Amazon (Wonder Woman/Storm):
Ororo yera una neña “metamutante” que naufragó cerca de Temiscira, la isla les amazones, y la reina d’estes afíala y críala como princesa. Cuando crez descubre que ye a llamar el poder de les nubes y dexa la isla como “Wonder Woman”, la embaxadora de les amazones pa col mundu de los homes. D’esta superheroína sabemos de los villanos a los que s’enfrenta pol corréu los llectores, pos na hestoria namás tien un alcontronazu con Poseidón. La claustrofobia de Storm n’universu Marvel tórnase n’Amalgam en talasofobia (mieu a la mar).
Esta serie nun la asegundaron na otra tanda, anque Ororo sí sal nos dos númberos de JLX, la entemez de la Justice League y los X-Men. Amás, na primer tanda tamién sacaron Bullets and Bracelets, na que la hermana adoptiva d’Ororo (Diana, la Wonder Woman de DC con dellos elementos marvelinos) axúntase cola amalgama del mozu la heroína con Punisher, y faen pehí de xusticieros.
Iron Lantern (Iron Man/Green Lantern)
Hal Stark, el propietariu d’una empresa aeronáutica, ta de pruebes cuando un estraterrestre mortecín lu atraye bruscamente a la so nave, faciendo que s’estrelle. Mancáu pol güelpe y atopando’l ser d’otru planeta yá muertu, ye a usar la teunoloxía de la nave pa diseñar una armadura que-y permita sobrevivir a la firida que se fixo en corazón, acabar colos estraterrestres que mataron aquel ser y tornar a so casa. Ellí conviértese en superhéroe Iron Lantern, que dacuando trabaya pal planeta viviente Oa (entemez del planeta de los Green Lanterns y Ego, el planeta con conciencia qu’interpreta Kurt Russell en Guardians of the Galaxy Vol. 2). El so archienemigu tien un nome espantosu, “Mandarinestro” (Mandarin/Sinestro).
Creáronlu pa la tanda de 1997, polo que nun tuvo oportunidá de protagonizar un segundu cómic.
Bono, y como dicíemos, salieron munchos más. Por mentar dellos: Spider-Boy amalgamaba a Spider-Man col clon rapacete de Superman; na yá mentada JLX presenten l’equipu como la fraición metamutante de la Judgement League of Avengers (estos nun tuvieron coleición propia, pueque porque los Vengadores nun yeren tan populares naquella); a Batman amalgamáronlu una segunda vegada, nesa con Nick Fury, en Bruce Wayne, Agent of S.H.I.E.L.D.; Speed Demon, pola so parte, entemecía’l velocista Flash y el maldicíu Ghost Rider. Pero, como dicíemos, son munchos pa tratar nun articulín, y si quedáis coles ganes… ¡Tais tardando n’apuntar los cómics a la llista de llectures pendientes! Si eso nun vos farta, tamién podéis echar una güeyada a los fanarts y fanfics d’Internet, qu’estes hestories espertaron el maxín d’abondos aficionaos y hai dalgunos trabayos estraordinarios.
Y quién sabe, quiciabes, nun futuru, a les compañes-yos dea por rellanzalos…
