Sony, la productora que tien los drechos audiovisuales de Spider-Man y los sos personaxes secundarios, llegó apocayá a un alcuerdu con Amazon pa que la canal produza delles series rellacionaes con dellos. Tiense falao d’una serie de Silk, una superheroína que garró poderes de la mesma araña radioactiva qu’al Home-Araña, pero agora IndieWire asoleya que tán preparando tamién una serie d’aición real sobre la versión Noir de Peter Parker (podéis ver la noticia orixinal calcando equí). De momentu sabemos que taríen al cargu Phil Lord y Chris Miller (direutores de The Lego Movie y 21 Jump Street), y tamién que’l guión ye d’Oren Uziel (John Wick 4 y The Lost City).
Spider-Man Noir ye una versión alternativa del superhéroe que s’asitia nos años trenta, dándo-y un importante tonu detectivescu ente’l hardboiled y los mystery men de la época, que ye como se llama a los precedentes de los superhéroes como The Shadow. Por destacar delles diferencies cola versión más conocida de Peter Parker, los poderes d’esti son d’orixe máxicu, y los sos enemigos son más bien criminales esformes que supervillanos. Tien protagonizao trés series curties d”historietes ambientaes nesti Universu Noir, dalgunes otres apaiciones nes series del Spider-Man orixinal, y estrenóse como personaxe de película d’animación y garró fama en Spider-Man: Into the Spider-Verse, poniéndo-y voz Nicolas Cage.
