La canal de streaming del xigante corporativu nun paez matar les ganes de facer coses grandones, y tres de la estrena de Lord of the Rings: The Rings of Power, la serie más cara de la historia de la televisión, sigue buscando grandes franquicies qu’esplotar. Va poco más d’un mes contábemosvos que tán preparando una serie de Warhammer 40,000 con nada menos que Henry Cavill de protagonista (podéis velo calcando equí) y agora tienen el puntu de vista na arqueóloga más famosa del mundu, Lara Croft.
The Hollywood Reporter cuenta (equí) que la canal prepara un universu cinematográficu enteru pa ella sola, que nuna primer fase consistiría nuna película, una serie y un videoxuegu rellacionáu con elles. De momentu sabemos poco, que la encargada de guionizar y producir la serie sedría l’actriz y escritora Phoebe Waller-Bridge, y que los trés productos compartiríen universu.
Tomb Raider yá s’adautó al cine n’otres trés ocasiones, primero encarnada por Angelina Jolie, en dos películes, y años dempués por Alicia Vikander. Esta cabera tenía una continuación planiada, pero foi atrasándose por mol del andanciu y paez qu’a la final quedó pa prau. Netflix tenía planiao producir una serie d’anime, pero tamién acabó abandonándose por disputes al respeutive de los drechos pa facelo.
