L’ésitu d’American Horror Story, cola oncena temporada a puntu de salir y renovada yá hasta la trecena, afaló a Ryan Murphy a crear una pondera, a la que-y punxo’l mesmu nome pero en plural pola mor de que nella nun cuenta, como na otra, una hestoria distinta en cada temporada, sinón una curtia en cada episodiu. Y dende’l primeru, como ganchu pa vendela a los aficionaos a la serie madre, dacuando faen referencies a ella, compartiendo universu y desvelando aspeutos de personaxes o llugares que nun conocíemos, mientres que n’otros capítulos va un poco más a les ocurrencies. Llamentablemente, esta segunda temporada tien más enclín a lo segundo, y con ello pierde tamién, nos más de los episodios, esa atmósfera y esi estilu tan propios de les American Horror. Dacuando paez más que tas énte una serie como Twilight Zone o The Outer Limits, lo que nun tendría nada malo… de llamase la serie d’otra manera.
Anque la temporada tien namás ocho episodios, hai dalgún que se fai llargu, y los únicos que podemos encamentar ver son, quiciabes, los siguientes: El primeru, Dollhouse, bultablemente’l más cercanu al espíritu orixinal; el segundu, Aura, a mediu camín ente esti y el “smartpunk” de Black Mirror, al xugar col entemez de lo sobrenatural coles nueves teunoloxíes; y Necro, el más siniestru, quiciabes por realista, y que bebe de películes yá clásiques y bastante asqueroses como Nekromantic o Dellamore Dellamorte. Ye una pena que los otros capítulos resulten bastante intrescendentes, pero estos mentaos tán bastante bien como pa da-y una oportunidá a una tercer temporada que seguramente van sacar l’añu qu’entra.
