La yá bien llarga serie de Ryan Murphy y Brad Falchuk llega a la docena temporada, y failo con un fichaxe bastante llamaderu; pueque, magar desque s’estrenó en 2011 tien perdío bastante audiencia.
La serie, por si nun vos suena, ye más bien una antoloxía, porque cada temporada se centra nuna hestoria diferente y, anque los actores repitan, faenlo cuasi siempre como personaxes distintos. Una temporada pue dir d’una casa embruxada, otra de bruxes, otra d’estraterrestres… cuasi nun queden temes por tocar. Y, sobre’l repartu, tienen pasao per ella (amás, per unes cuantes temporaes) actrices de la talla de Jessica Lange o Kathy Bates, y ente los que más repiten tán Sarah Paulson o Evan Peters, qu’escomenzó cuando tovía nun lu conocía naide. Otra habitual de la serie, y que va protagonizar esta temporada nueva, ye Emma Roberts (sobrina de Julia), pero nesta ocasión va acompañala nin más nin menos que Kim Kardashian, personaxe que por si nun sabéis vien del famoséu norteamericanu y, dende la prensa’l corazón, pasando per un reality, acabó como empresaria portada de la revista Forbes. Tien yá salío en cine y televisión, pero más que nada en cameos, y nunca nada paecío a un papel protagonista como pal que-y dan agora una oportunidá, con un personaxe “divertíu, estilosu y apavoriante”.
Sobre la hestoria en sí mesma, sabemos pola música del mui curtiu avance (podéis velu calcando equí) que va tener dalgo que ver con neños, y ye que, polo que cuenten, va tar basada na novela Delicate Condition de Danielle Valentine, una versión actualizada y con tintes feministes de Rosemary’s Baby (la película estrenada n’España, con un spoiler grandísimu en títulu, La semilla del diablo). Trataría, asina, sobre una muyer que ta convencida de qu’una presencia sobrenatural-y impide tener fíos.
La temporada estrénase esti branu en Disney +, pero tovía nun tenemos fecha exauta.
