American Jesus ye una triloxía de series curties de cómics, guionizaes por Mark Millar (The Ultimates, Civil War) y dibuxaes por Peter Gross (Lucifer, The Unwritten). Estes traten, como lo más seguro ye que yá lo aldovinareis, sobre la segunda venida de Xesucristu na América de los años ochenta. Esti ye un adolescente de doce años que vive nun pueblín norteamericanu, y cuando descubre que ye Xesucristu, con poder pa convertir el vinu n’agua y eses coses, ha acostaciar cola responsabilidá qu’eso trai consigo. Magar que paez un argumentu mui esparatáu, y que Millar nos tien avezaos a coses bastante lloques, la verdá que’l tema ta tratáu con seriedá y tol realismu posible.
El casu ye qu’agora, baxo’l nome de The Chosen One, Netflix saca un avance de l’adautación n’aición real, que va estrenar yá en nada, pal dieciséis d’agostu. Tenéislu calcando equí, y nél, anque ye mui curtín, podemos ver un poco l’enfoque que-y tán dando.
American Jesus ye una obra que fai parte del llamáu “Millarworld”, un universu que comparten munches de les obres de Mark Millar al estilu de los grandes universos en comuña, como los de Marvel o DC. Otres obres d’esti mundu son bien conocíes poles sos adautaciones al cine, siendo’l casu de Kick-Ass o Wanted, y Netflix yá intentó, con mui pocu ésitu, adautar otra, Jupiter’s Legacy, en formatu de serie. Anunciándola como dalgo paecío a una The Boys propia (la serie d’Amazon qu’ostenta’l récor de ser la más vista de xéneru superheroicu), la cosa acabo mal y anunciaron la cancelación al poco d’estrenar la primer temporada. Esperemos que pa esta, que pol protagonista guaḥucu y la temática, más simbólica qu’impresionante (quiciabes bastante cercana a Sweet Tooth), tien otru tipu de públicu y pue funcionar bien.
