Entrevistamos a Ana Pereira, autora de la novela ilustrada de fantasía Bederre, que ta acabante salir del fornu.
Ana, ¿qué podemos alcontrar en Bederre?
Fantasía, mitoloxía, aventures y desventures, pero sobre too ironía y unes cuantes rises. Eso sin dudalo. Lo meyor de too ye que ye d’eses histories que te dexen bon cuerpu al acabar de lleeles.
Cómo dixo un collaciu, “ye dalgo más qu’un amor de veranu”.
Na hestoria aproxímeste a la mitoloxía asturiana d’una manera diferente a como se suel facer. ¿Por qué?
A mi dame la impresión de que’l tema mitolóxicu asturianu fai años que se metió nuna urna y s’abandonó na estantería los trastos nun suétanu que nun visita naide, a nun ser pa decir eso de “meca, acuérdeste cuando se llevaba ésto”?. Yá ye hora de pega-y un cambiu. Ye hora d’actualizase. Hai montones d’histories de les mitoloxíes d’otros llugares, que no fondero son lo mesmo que la nuestra, pero caltiénense vives na cultura y son dalgo más que l’alcordanza d’un pasáu. ¿Por qué nun puen traese eses histories al momentu actual?
Va unos meses ganasti’l Premiu Radagast con Cuntadora, pero primero de que salga yá tienes esta otra obra editada. ¿Cómo te dio de sópitu por escribir tanto?
Les coses pasen cuando tienen que pasar y ehí axuntáronse delles coses pasando a la vez.
Per un llau, llevo tola vida cuntando histories, unes en lletres y otres en forma dibuxos. Lo de los dibuxos ye una parte más visible y per ehí anden les ilustraciones de Bederre, pero hay montones de coses detrás. Oleu, acuarela, tinta, llápices de colores… todo ello xunto dexa cuntar coses, pero nun dexa de ser un momentu conxeláu. ¿Y si se contare la historia entera? Pa mi l’escribir ye un progresu nesi tema. Ye como cuando’l cine garró la fotografía y dio-y vida.
Tamién fai años qu’escribo un blogue (yera más barato que dir al psiquiátra) y lo curioso ye que pasaba xente per ellí que nun conocía de nada y decíen que prestaba lleeme…y siguí escribiendo.
Lo definitivo fue Radagast con L’Horru de Vapor. Hai veces que lo que necesites pa dar el pasu ye que te pieguen un emburrión, y esi foi’l míu: la collaboración con esi llibru.
¿De qué autores pienses que tien influyencies Bederre? ¿Qué te gusta lleer?
Home, salta a la vista que Neil Gaiman y Terry Pratchett tan ehí. Esi puntu surrealista y ácidu… pa mi ye vital. Ye como una forma de autodefensa n’esti mundu tan triste.
¿Qué me gusta lleer? Tolo que pillo. Más o menos. Fai tiempu llegué a la conclusión de qu’hai muncho pa lleer y pocu tiempu, asina que garro cualquier cosa y, si en cincuenta páxines nun me convence, fuera con ello. Vamos pal siguiente. Fáenme muncha gracia les típiques llistes de “los llibros que tou dios tien que lleer”. Pero si la metá (o más) son infumables… ¿Qué me tas cuntando? ¿Quién decide esta morralla? La xente tien que lleer lo que-y preste, pero lleer, qu’aporte dalgo, anque seya un pelín d’emoción a la vida…
Agora mesmo, na mesina, tengo a Poe, un manual d’historia de la cultura xaponesa, una gramática francesa, un llibru poesía de Rudolfo Martínez, un llibru sobre’l taró (“vienen cosines”) y dellos mangues. Depende del ánimu, unes veces necesítase lleer una cosa y otres otra.
¿Qué te paez esti espoxigue tan tremendu que ta teniendo la fantasía n’asturianu nestos últimos años? ¿A qué pienses que se debe?
“Ya yera hora” define del too lo que pienso.
A mi paezme que ye una salida l’armariu que diba llargo que se necesitaba. Eches la vista atrás y tolo que se te presenta delantre los güeyos de lliteratura n’asturianu ye puramente “una fantasía”, pero non de les que presten, sinón de les qu’imaxinen una tierra maraviosa que pudo esistir, pero que nun ta. Refocílase muncho nel “locus amoenus” (esi llugar idilicu asturianu enllenu vaquines, oveyines, aldeaninos…). Que non, home, que non. Qu’hai más coses nesti mundu, y nos paralelos y alternativos…
La xente que ta escribiendo fantasía n’asturianu, faime gracia, pero ye de la mio edad, y, ye curioso, tolos que conozo personalmente, cuando yéramos guaḥes, yéramos los rarinos que lleíamos cómics, llibros de fantasía y rebuscábemos animes pelos videoclubs… Ta claro que dimos el pasu y se ta faciendo gala d’un arguyu fantásticu. Ya nun hai vergoña, nin de sentise asturianu, nin de falar asturianu, nin d’esfrutar con histories fantástiques. Porque, cuando ún da’l pasu, el restu que tán escondíos salen a acompañalu. Y eso ta prestándome por la vida.
¿Tienes planes pa escribir más coses? ¿Dalgo ente manes?
Siempre hai que facer daqué. De Bederre, hai dellos personaxes que piden a gritos contar la so historia, y yá ta empezada la d’ún d’ellos.
Pícame muncho facer novela gráfica y prestábame tirar p’alantre con ello con Cuntadora, el III Premiu Radagast. Ye un trabayu de la virxe, pero, solo por satisfacción personal, prestábame facelo.
Ente manes… la de mi’madre de coses. Pero too tien el so momentu, asina que llevantaré un día con un cable cruzáu, sentaré delantre l’ordenador y saldrá la maxa.
Mientres tanto, lleéi Bederre, que va prestavos.
Tenéis Bederre a la venta nes llibreríes de toa Asturies y na páxina de Radagast, de la que vos dexamos l’enllaz calcando equí.
