Ayeri (como vos contemos equí) celebróse en Xixón la presentación de La Vieya, obra cola qu’Aique Fernandi ganó’l II Premiu Radagast de Lliteratura Fantástica, Ciencia Ficción y Terror. Y, nesta anuncióse tamién la obra ganadora de la tercer edición del Premiu. Formando’l xuráu’l propiu Aique Fernandi, l’escritor Abel Martínez y la llibrera y trabayadora nel seutor editorial Natalia González, tomóse’l veredictu de declarar ganadora la novela Cuntadora, d’Ana Pereira.
La obra, que ye de ficción científica con toques steampunk y decopunk, ta basada nel relatu que la mesma autora yá tien espublizáu na antoloxía L’Horru de Vapor, utilizando esti a mou de primer capítulu pa darréu contanos tolo qu’hai detrás d’eses pincelaes que nos dio. Na novela preséntanos un mundu futuru (sieglos XXV y XXVI) cargáu d’imaxinación, y una protagonista robótica, la Cuntadora, que tien como trabayu relatar hestories antigües a mineros que pueblen una estraña ciudá-colmena mientres estos se recuperen n’hospital.
Ana Pereira tamién ye ilustradora, y como tala ye l’autora de la portada d’El Cantar de Suaro Caínez d’Andrés Fernández, publicada por la mesma editorial. Amás, Pereira ye miembru de la tertulia lliteraria de fantasía n’asturianu que se celebra n’Uviéu, L’Aruelu.
Tanto L’Horru de Vapor, como El Cantar de Suaro Caínez y La Vieya tán a la venta yá en llibreríes y na páxina web de Radagast (que vos dexamos calcando equí). Pa Cuntadora, por embargu, va haber qu’esperar al añu que vien, a la próxima ceremonia de presentación y na que se dará’l veredictu de la próxima edición del Premiu, pa la que pronto va abrise’l plazu.
Dexámosvos darréu una ilustración de la protagonista de la obra que l’autora publicó apocayá en redes.
