Nin los nuesos pas nin los nuesos güelos s’alcuerden d’un andanciu como’l que tamos viviendo anguaño. Nunca nun se decretó la cuarentena y quedar en casa d’esta manera y, si se fixo, foi más por razones polítiques y militares que por una razón médica. Sicasí, esto nun quier dicir que los andancios seyan dalgo estraño a la historia de la Humanidá. En realidá, hebo bien d’ellos a lo llargo de la Historia. ¿Sabríeis dicinos cuálos son? Nesti artículu quiximos facer un repasu de los andancios más importantes n’otres dómines. Vais ver que, si lo comparamos bien, nun tán tan mal les coses como se pinten.
La peste o la plaga:
De tolos andancios, la peste, peste negra o plaga ye’l más conocíu de toos. Trátase d’una enfermedá infectocontaxosa que provoca la bacteria “Yersinia pestis” y que tresmitíen les pulgues de les rates. Pue tratase con antibióticos (na edá media, que foi cuando más importancia tuvo entá nun había) y tien una mortalidá del 16% en casu d’aplicalos rápido. Si nun s’apliquen a tiempu o si nun s’empleguen, la mortalidá d’esta enfermedá ye de más del 90%. Dexó un posu importante na cultura y na historia y inspiró obres como “De triomf van de dood” (El trunfu de la muerte).
La peste non solo ye la más importante, pos estímase qu’arrampuñó cola vida de 200 millones de persones a lo llargo de la Historia; sinón que, tamién, ye la que más posu dexó na lliteratura y na cultura occidentales. Nun vemos esi posu namás nos cuadros de la dómina (o d’otres dómines posteriores) sinón, tamién, en creaciones d’anguaño como por exemplu’l videoxuegu Dishonored, onde vamos a una ciudá imaxinaria que tien muncho de ciudá europea de la dómina.
Lo que mos dexó la peste: l’embozu y la cuarentena
La Peste dexónos coses qu’emplegamos anguaño. Por exemplu, la idea de cuarentena vien de “Quaranta giorni”, que yera una midida qu’en puertos como’l de Venecia adoptaben colos barcos qu’acababen de llegar p’asegurase – neto qu’anguaño – de que los recién llegaos viaxeros nun pasaben l’andanciu a la población sano de la ciudá. L’embozu que ta usándose anguaño tien poco que ver col que s’emplegaba na dómina de la peste, que tien una forma mui carauterística y que servía pa evitar la infección según les creyencies de la época (que resultaron nun ser ciertes); pos yeren les pulgues de les rates asociaes a una hixene probe les responsables.
El cólera
El cólera foi l’andanciu “de moda” nel sieglu XIX. Hebo dellos españíos de cólera a lo llargo y ancho d’Europa especialmente importantes en 11817, 1829 y 1852; que son les feches de los andancios más importantes. Nesti casu la esperiencia nun yera nada bona – ta claro qu’en nengún andanciu lo ye – pero’l cólera yera particularmente duru. Trátase d’una enfermedá que provoca diarees y que produz la bacteria Vibrio cholerae. Estes diarees son les que causaben la muerte por mor de la deshidratación qu’impliquen. Anque nos países industrializaos nun hebo práuticamente cólera nos últimos 100 años, ello nun quita pa que n’otros países como pue ser la India y el Sudeste asiáticu tea tovía presente; anque non al puntu de suponer un andanciu como los qu’amentábemos primero.
Na cultura popular el cólera tamién tuvo daqué d’impautu. Asina, vemos noveles como “La Peste” del francés Camus o noveles como la del Premiu Nobel de Lliteratura Gabriel García Márquez “Amor en tiempos del cólera” dexaron posu na historia y na tradición europees.
VIH/Sida: Una enfermedá con cura
El VIH/Sida foi l’andanciu más global y duraderu de toos. Nun ye que tovía nun esista – claro qu’esiste y hai bien de xente infectao d’él – pero nun tien la mortalidá que tenía primero. Non solo va unos pocos meses descubríase la cura del VIH; sinón que dende va unos años les persones que lu teníen teníenlu más como una enfermedá crónica que como la enfermedá mortal que fore primero. Per contra, nos ochenta’l VIH/Sida foi un andanciu permortal pente la población en xeneral y, especialmente, pente los coleutivos d’homosexuales, que foron los que más sufrieron esta enfermedá por ser más fácil de contaxar d’home a home que d’home a muyer o muyer a home. Por suerte, una bona política de prevención, l’emplegu de preservativos y el fin de la heroína consiguió pone-y frenu en gran midida.
La cura que tien el VIH/Sida fai que, afortunadamente, esta enfermedá pase a la historia pero non ensin tar bien presente na cultura popular de les últimes décades. Creadores como Pedro Almodóvar averáronse a esta enfermedá en bien de películes y llibros.
Gripe española: Millones de muertos
La gripe ye un andanciu habitual, quiciabes l’únicu al qu’esperamos tolos años y que vemos normal garrar. Pero de toles gripes hai una que llama l’atención polo dura que foi y pola cantidá pergrande de vides que llevó per delantre. Trátase de la Gripe Española de 1918; qu’anque nun foi n’España onde surdió, sí foi’l país nel que más víctimes mortales provocó; al puntu de qu’esti añu pue vese nos llibros d’historia como una mengua na pirámide poblacional. El rexitru de les víctimes ye desigual per país – como pasa anguaño colos rexistros del COVID19 – pero estímase que la gripe española de 1918 mató a un total d’ente 20 y 40 millones de persones.
Na ficción podemos ver la gripe española en sitios tan estremaos como Twilight o’l Ministerio del Tiempo.
Viruela: l’arma biolóxica de la conquista d’América
La de la viruela ye una de les vacunes obligatories que recibimos al poco de nacer. Esto fai que la enfermedá yá nun seya un riesgu pa la mayoría de la población (en tou casu pa la población vacunao) pero nun quita pa que, nun pasáu, esta enfermedá convertiérese n’andanciu y acabare matando a millones de persones. Hasta la vacucación hebo viruela siempre, pero foi nel continente americanu onde más dañu provocó esta enfermedá. Calcúlase que millones de persones que vivíen n’América primero de la llegada de los europeos morrieron por mor d’esti andanciu pal que los humanos, hasta la vacuanación, nunca tuvimos preparaos pero ellí tábenlo menos tovía, porque yera pa ellos tan nuevo como’l COVID19 pa nós.
1 comentariu