Andrés Fernández (2003) ta acabante de convertise nel escritor más mozu de les lletres asturianes. Con namás 18 años, esti estudiante de filoloxía románica ta acabante d’asoleyar la novela ucrónica “1809: Cartes de la Revolución de Trubia”, una novela que mos lleva a una hestoria alternativa de les guerres napoleóniques n’Asturies onde la hestoria va construyéndose al traviés de cartes.
¿Por qué’l sieglu XIX y les guerres napoleóniques?
Podría citar munches razones pero yo creo que puen sintetizase toes nel fechu de que toi bravamente fascináu por esi sieglu. La estética, la ropa, el mou de falar, les personalidaes que vivieron nél y tamién la hestoria, claro. El sieglu XIX ye una etapa de cámbeu radical, morría un mundiu pa dar pasu a otru, colos desaxustes ñaturales qu’eso xenera y la miríada de posibilidaes que pudieron ser pero nun foron. El sieglu XIX ye, por dicilo asina, una mina lliteraria, y más n’Asturies, onde asocedieron eventos del altor de la Revolución de Mayu de 1808.
“El sieglu XIX ye una etapa de cambéu radical, morría un mundu pa dar pasu a otru”
L’artista de la portada de 1809, Xon de la Campa, foi tamién l’ilustrador de Depués d’Ochobre, otra obra ucrónica de la mesma editorial y tien hasta una mesma “mise en scène”. ¿Hai un interés poles ucroníes?
Yo creo que sí qu’hai un ciertu interés poles ucroníes y ye normal, la hestoria, y más l’asturiana, ta enllena de momentos pivotales nos que pudieron desendolcase escenarios bien estremaos a los que realmente ocurrieron y nun-y habría sorprender a naide qu’heba xente queriendo esplorar eses realidaes alternartives. A la fin esa ye la esencia de la lliteratura, conectar la realidá cola ficción al traviés de la creatividá del autor.
Hai xente a la que-y cuesta dar el pasu a escribir novela. ¿Foi’l casu? ¿En qué xéneru te sientes más cómodu?
Les noveles impresionen, ta claro, nun son rellatos o narraciones breves. Pal escritor novel son un retu bien bultable y por eso hai un ciertu mieu, ye normal, pásamos a toos, pero nun queda otra que superalu. El movimientu amuésase andando y si nun entames nunca nun vas poder ameyorar, porque la manera de llegar a ser un bon escritor ye escribir, escribir y escribir. Muncho de lo qu’escribas sedrá malo, pero deprendemos tamién (y sobremanera) de los nuesos errores.
Yo personalmente entovía nun descubrí’l xéneru nel que toi más cómodu, entovía teo qu’esplorar la mio creatividá, pero’l formatu epistolar la verdá ye que me prestó abondo, yo diría que ye un formatu cenciellu pa un escritor novel porque funciona por “compartimentos estancos”, primero una carta y llueu la otra, y eso facilita’l trabayu muncho, anque supongo que ye una apreciación personal.
“L’epistolar ye un formatu cenciellu pa un escritor novel porque funciona por “compartimentos estancos”
Escribisti la novela con 17 años ¿Cuándo empezasti a escribir y por qué?
Nun sabría dicir cuándo entamé a escribir, pero l’amor y l’interés que teo pola lliteratura vienme dende bien nenu. La verdá que dende los años caberos de la primaria yá, recuérdome con una llibretuca embaxo’l brazu, anque claro, aquello qu’escribía yera mui primitivo. Creo que foi nel segundu ciclu de la ESO, va unos seis o cinco años, cuando entamé a escribir de manera “seria”, que coincidió col momentu en que escomencipié a cursar l’asinatura d’asturianu. La verdá ye que tuve unos profesores mui bonos, Elena y Félix, que m’afalagaron a escribir y desendolcar esi “yo escritor” que llevaba dientro.
Quiero que la lliteratura asturiana llegue a nuevos horizontes y no posible deseo ser partícipe d’esi cámbeu de direición tan necesariu”
La novela ye epistolar ¿Por qué te decidisti por esti xéneru? ¿Ganes d’esperimentar?
Digamos que se xuntaron la fame coles ganes de comer. Como tolos que me conocen saben y como yá dixi enantes la estética del sieglu XIX vuélveme llocu y carteame con xente yera dalgo que siempres quixi facer, y claro, un día falando con Nicolás, l’editor, y con otra amiga, Alba, surdió la idea. Coincidía amás que nesi tiempu taba lleendo “Cartas Marruecas” de José Cadalso y tamién “Memorias del levantamiento de Asturias en 1808” de Ramón Álvarez Valdés y claro, comprenderá’l lleutor que nun tuvi que pensar muncho más pa idear la novela.
Arriendes d’esto tamién ye verdá que tenía ganes de facer dalgo distinto, de francer los marcos comunes de la novela asturiana. Nun sé si ye por ser mozu y ambiciosu o por qué pero quería y quiero entá que la lliteratura asturiana llegue a nuevos horizontes y no posible deseo ser tamién partícipe d’esi cámbeu de direición tan necesariu pa que la nuesa llingua puea tener vida plena. Nun pue pasamos lo qu’hasta agora, que s’arrequexó a l’asturianu nunos ciertos rincones lliterarios ¿Por qué nun vamos poder escribir ciencia ficción o fantasía n’asturianu? ¿Por qué nun vamos poder satisfacer la nuesa orixinalidá n’asturianu dafechu? Eso ye lo que pienso.
¿Por qué nun vamos poder escribir ciencia ficción o fantasía n’asturianu? ¿Por qué nun vamos poder satisfacer la nuesa orixinalidá n’asturianu dafechu?
Llama l’atención de la novela’l rexistru nel que ta escrita: Tal paecería que son cartes d’entamos del sieglu XIX que recuerden a la manera na que Xovellanos escribía n’asturianu. ¿Cómo foi’l procesu de documentación y preparación?
Nun sé mui bien cómo responder a esta entruga porque realmente esi procesu de documentación yo casique nun lo percibí como tal. Como dixi fascinóme siempres esa dómina y meteme a restolar perhí a ver cómo escribíen cartes nesos años, qué abreviatures usaben y demás pa min yera un pasatiempu, como tamién lo foi lleer “Cartas Marruecas” y otres obres.
Una de les coses que llama l’atención de la novela epistolar ye que les aiciones decisives cuéntense siempre “a toru pasáu”. Cuando lleemos una carta d’una persona sabemos que ta viva nel momentu en que la escribió. ¿Foi difícil caltener el ritmu narrativu con esti “hándicap”?
Sí, esi foi un retu importante, porque como bien dices una carta escríbese “a toru pasáu”, si tas metanes una batalla o restolando nun despachu de nueche nun te vas parar a escribi-y al to collaciu lo que tas faciendo, vas facelo hores o incluso díes depués y eso ye un cámbeu mui bultable no que cinca la narración, porque ye esautamente lo contrario a lo que tamos avezaos. De toles formes eso tien tamién el so encantu, porque a la fin cada carta ye una sorpresa.
Nos 80 la xente dicía que l’asturianu taba morriendo y un autor de 18 años nacíu depués del 11-S, de l’Estatutu, de l’Academia equí sal con una novela nueva. ¿Cuála ye la salú del asturianu pal to paecer?
Yo creo que decente, tamos lloñe de tar “en perfechu estáu de salú”, pero l’asturianu vive y non solo eso, sinón que vive con una vitalidá destacable. Hai más falantes, tamién mocedá anque nun lo paeza, cada día que pasa normalízase más… Hai tá munchu camín per andar, pero tamién llevamos un bon trechu andáu y nun paez que vayamos aparar ceo. Nun hai que desillusionase nin llevase a engaños apocalípticos, avanzamos, pali que pali, pero avanzamos y lo que ta claro ye qu’hai que siguir puxando por esta llingua maltratada pa que nun seya solo la llingua de los nuesos güelos, sinón tamién la de los nuesos ñetos. De siguir asina nun teo duldes de que pronto vamos poder restituyila al so sitial llexítimu (arrodiáu de lloréos inmarcesibles rellumando con brillu aurifulxente).
“Hai más falantes, tamién mocedá anque nun lo paeza, cada día que pasa normalízase más…”
La Revista Formientu fundóse cuando tu teníes 3 años. Va poco escribisti nella como cuasi tolos y les escritores más nuevos. ¿Crees qu’hai una “xeneración formientu” como dicen dellos?
Bona entruga de difícil rempuesta. Yo personalmente nun lo veo asina, o non esautamente asina. Ta claro qu’hai una xeneración d’autores que crecieron “a la solombra de Formientu” y que tuvieron la revista como campu de pruebes, pero nun creo qu’heba una xeneración nel sen lliterariu del términu, o yo polo menos nun veo unos venceyos distintivos y propios ente toos esos autores, anque sí que puea habelos ente ciertos grupos. Más que xeneración Formientu yo creo que podríemos dicir “xeneraciones” Formientu.
¿Cómo ves la lliteratura asturiana anguaño?
Con esperanza. Creo que tamos entrando nun procesu de rexeneración y toi bravamente illusionáu por ver en qué para too esto. Hai autores nuevos que tamos asomando la cabecina, otros que yá llevaben un tiempu ehí y qu’agora se descubrieron al mundiu pa gayola común y placer de los sentíos, como Blanca Fernández, y tamién otros más veteranos pero que decidieron dar una vueltina a la so obra y esplorar xéneros incógnitos, como’l Rol o la Fantasía, como Nicolás Bardio.
Y arriendes d’autores hai que destacar tamién munches iniciatives que tan collaborando n’esti procesu, como’l premiu Enriqueta González Rubín, o’l premiu Radagast. Como dixi yo teo esperanza de que d’equí pue salir dalgo grande.
¿Qué-y falta?
Diría que variedá, tanto na forma como nel fondu. Nun pue ser, por exemplu qu’heba solo una novela de fantasía adulta, Del Llau del Nigromante; hai qu’innovar y facer lliteratura pa una Asturies nueva, na que la señardá pola aldea perdía yá nun ye tan importante y, más importante, hai que facer lliteratura pa la xente, lliteratura pal nuesu pueblu. Nun podemos enzarranos nos círuculos viciosos del mundiu intelectual asturianu y tratar siempres los mesmos temes y formatos, como dicíen aquelles pancartes de los ochenta (que yo nunca nun vi) hai que volvéi la llingua a los asturianos, hai que facer lliteratura pa los asturianos.
¿Qué-y sobra?
Intelectualismu. Sóbra-y la mal llamada “alta lliteratura”, el realismu, el costumismu… Nun digo que seyan malos xéneros, nin qu’eses noveles seyan males, pero nun ye una novela que llegue a la xente y menos a la mocedá, que ye lo que más falta mos fai. Auto-fagocitase pue paecer una solución cómoda, pero si quieremos que l’asturianu y que la lliteratura asturian tengan futuru tenemos que salir de les cuatro parees “segures” ente les que tamos agora y, falando en plata, “baxar al barru”.
Entós entiendo que nun tarás d’alcuerdu cola xente que considera la ficción especulativa como “lliteratura d’entretenimientu” o menor, ¿non?
Non, por supuesto que non. Nun soi nada partidariu d’esi mou de pensar, nun creo que se pueda dixebrar asina la lliteratura ¿Por qué nun va ser “alta” la lliteratura de ficción? Pretender llendar asina la lliteratura ye como pone-y portielles a la mar. Como dixi na feria’l llibru de Morcín la lliteratura ye una oda a la creatividá humana y ye tan válido facer ficción como lliteratura costumista o d’otru tipu asemeyáu, o incluso más ¿Dalguién afirmaría que la obra de Tolkien nun ye una obra con fondura? Eso sedría una llocura. La ficción ye igual de válida pa representar les pasiones humanes.
¿Qué te prestaría poder lleer n’asturianu?
Munches coses, nun sabría nin per ónde entamar a enumberar. Fantasía asturiana, propiamente asturiana, ciencia ficción, cómic, noveles steampunk (comprenderá’l lleutor que’l steampunk me fascina), más ucroníes… Y traducciones, claro, traducciones tamién faen falta. Hai que tener en cuenta que, por exemplu, a día de güei nun tenemos más que dos llibros de Tolkien tornaos, El Hobbit y La Sociedá del Aniellu. Afortunadamente nel futuru tará tornáu El Señor de los Aniellos enteru, pero restaría El Silmarillion entovía.
¿Cuál ye’l to próximu proyeutu?
Teo munchos, anque’l más inmediatu ye otra novela qu’enancha l’universu qu’entamé con 1809, pero teo más idees y bocetos. Quiero facer fantasía, quiero esplorar el xéneru steampunk, quiero dar más variedá a los mios personaxes… En fin, quiero facer munches coses, supongo que ye lo que tien ser mozu y ambiciosu.
Un fragmentu de la obra
La novela 1809 edítala Ediciones Radagast y podéis mercala calcando nesti enllaz. Equí dexámosvos una de les 36 cartes que la componen.
Carta primera:
Del diputáu por Morcín don Manuel González Candamu al rerepresentante de la Xunta Soberana en Sevilla don Gaspar Melchor de Xovellanos
Mui estimáu y mui ilustre señor don Gaspar Melchor
de Xovellanos;
Escríbo-y estes llinies con fonderu esmolecimientu pola seguranza de la so persona de vusté, pues aportaron noticies perpreocupantes sobro la capitulación y posterior ocupación de la villa de Madrid por parte de les tropes franceses, socesos que, según se diz na correspondencia, obligáronvos a vusté y a la Xunta Central y Suprema de Gobernación a afuxir pa Sevilla con gran priesa
y siendo escorrida poles caballeríes del exércitu enemigu.Ruégo-y me confirme cola mayor rapidez posible na so rempuesta a esta carta que-y mando que, lo mesmo la so personalidá como‘l escmu. señor Marqués de Campusagráu, atópense yá abellugaos naquella eminente ciudá andaluza, los dos en perfechu estáu de salú. Pído-y tamién con fervor que me dea parte de l’actividá política de la Suprema, asina como del desendolcu de les operaciones
militares allá nes fasteres meridionales de la Corona yá que, como de xuru atalantó pola mor de la data na que compongo estes fueyes, la presencia de guarniciones imperiales na meseta torga en bona midida la llegada de correos per tierra a Asturies, ocurriendo qu‘estos tengan o que garrar un barcu y esponese a grandes peligros na mar o bien tomar grandes esviaciones pa entrar na nuesa tierra per Galicia.
Amás, como supongo qu‘al aviesu tamién pasará lo mesmo, quiero informar a so persona de tolos acontecimientos de relevancia qu‘asocedieron nestos pagos estes caberes selmanes, tanto nos campos de batalla como nes sesiones de la Xunta Soberana del Principáu d‘Asturies.
Primeramente dici-y qu‘Asturies entera ta llibre del xugu francés y nun ye d‘esperar qu‘ésti seya a forciar la so entrada nel territoriu, puesto que los puertos nun se puen cruciar pola mor de les ñeves, qu‘esti añu vinieron adelantaes por fortuna, y na Montaña de Santander el nuesu Exércitu Defensivu Asturianu, que pese a la derrota n‘Espinosa de los Monteros ta mui resueltu y caltién la moral bien alta, ta cubriéndose de gloria y dando exemplu de la so heroicidá y braveza, engarrándose vegada tres vegada col enemigu, ganándo-y munches aiciones; teniendo esto como resultáu qu‘al francés-y seya imposible pisar suelu asturianu. D‘otra manera, preocupa la constante retirada del escmu. Sir John Moor pa escontra La Coruña, lo que dexa les nueses llendes occidentales espuestes, pero yá ta en marcha‘l llevantamientu d‘una división al mando del xeneral Vórster que tendrá la misión de prevenir cualesquier ataque que puea llegar
d‘aquel Reinu.
Sicasí y magar que puea paecelo poles razones fasta agora espuestes, Asturies nun ta llibre de peligros y tarrezo tener que da-y razón a V.E del so orixe pues, a la contra de lo qu‘ún podría pensar nun primer momentu, éstos nun vienen de les fuercies foriates que mos invaden, sinón de los nuesos propios compatriotes, dalgunos de los cuáles, cobiciosos y traicioneros, aprovechen estos tiempos escuros y revueltos pa intentar algamar el poder a costa del bien de la nación. Y el ñeru del que parten
estes amenaces nun podía ser sinón la Real Audiencia d‘Asturies, que yá amosó les sos intenciones nos motinos del pasáu mes de setiembre.
Anque esos motinos pudieron ser apagaos gracies al xeneral Acevedo q.s.g.h, los miembros d‘esi muérganu ta combayando otra vegada pa intentar derribar de nueves a la Xunta Soberana, sofitaos tanto pola más rancia aristocracia, por considerar a les cortes asturianes «populares» n‘escesu, como polos lliberales más radicales, por tar dominaos éstos poles idees xacobines del centralismu más desaxeráu; anque‘l so aliáu más poderosu ye, ensin dubia dala, el Marqués de la Romana, el nuevu comandante
del Exércitu de la Izquierda, personax que consiguieron pa la so causa gracies a bilordios y mentires.
Por embargu, nós, anque gociamos del sofitu‘l pueblu, vemos disminuir la nuesa llista d‘amigos na clas política y na oficialidá día tres día. La situación ta volviéndose inalmitible y el peligru nel que s‘alcuentra Asturies ye mayor que nunca. Tarrezo que, de siguir asina la situación, nun mos quedará otra opción a los bonos patriotes que tomar cartes nel asuntu y llanzar un contra-güelpe pa torgar les aspiraciones d‘estos traidores sibilinos.
Entovía nun tenemos evidencies sólides, puesto que depués de los socesos de setiembre los traidores tán comportándose con munchu procuru; pero ye custión de tiempu que cometan un error, y entoncies actuaremos. Anque, como dixi enantes, na oficialidá nun tenemos demasiaos partidarios, podremos aseguranos la collaboración de dellos mandos d‘altu rangu, amás del sofitu xeneral de la tropa. Nun-y quiero dar más especificaciones pel momentu por tar aínda los nuesos planes nuna fase de desendolcu mui poco avanzada.Si-y ye posible quixera que, guardando no posible‘l secretu, afalare a la Xunta Central y Suprema de Gobiernu nel nuesu favor ya apremie a la mesma a convocar cortes.
Ensin otru particular col que molestar la so atención, despídome de la so persona de vusté con un saludu cordial y amistosu.
El so S.S.Q.B.L.S.M, Manuel González Candamu.A día de güei, 27 d‘avientu del añu de Nuesu Señor
1808
