Güei falamos con Andrés Fernández, autor de 1809: Cartes de la Revolución de Trubia y ganador del Premiu Enriqueta González Rubín, sobre la so novela nueva.
Andrés, ¿qué podríes contanos d’El cantar de Suaro Caínez? ¿De qué trata?
Ye una novela de fantasía épica con tema mitolóxicu, pero tamién políticu. Hai dos argumentos principales; una crisis civil dientro del propiu reinu de Carminia, ente una nobleza tiránica y el pueblu que reclama xusticia, al estilu Fuenteovejuna, y depués hai un conflictu esternu col imperiu d’El Llanu, los mouros. El protagonista que ye Suaro, con Roldán son los representantes del conceyu y tienen que bregar tanto col poder tiránicu como cola invasión. Y, bono, amás hai una tercer llinia que ye la de los peligros de la viesca, que tán ehí como esclucando: los güercos, les xanes… L’oficiu de los protagonistes ye ser “devaleones”, cazadores de los seres maliños qu’apavorien a la xente, y d’ehí derívase lo demás. Como tienen esa posición de deferencia y protección, asumen tamién les funciones de representantes del pueblu contra la tiranía y de protectores.
¿Cuáles diríes que son les tos influyencies?
Bono, yá menté dalguna, pero ehí ta Túrin Turambar, de Tolkien. Tolkien marcóme muncho de neñu, ye’l mio autor favoritu, lleí porrón y mediu d’él, y Túrin Turambar ye una hestoria que me prestó abondo. Esta novela mía tien munches influyencies d’ella, y del restu de la obra de Tolkien, por supuestu. Depués Amis et Amiles, que ye un cantar francés del sieglu XIII. La Chanson de Roland, tamién, La historia de los nobles cavalleros Oliveros de Castilla y Artús d’Algarve, que ye una novela del S. XV… Diría que la novela medieval en xeneral, la novela romance y los cantares de xesta, que me marcaron tamién bastante, sobre manera esti últimu añu que tuvi más en contactu con ellos, y esi tema de la paridá de caballeros tamién lu saqué d’ehí. Nos combates intenté más o menos copiar esi tonu y esi estilu, lo que pudi. Depués otros llibros de fantasía, y la mitoloxía asturiana y la narrativa popular asturiana, que ta ehí metida sucintamente. Y la historia d’Asturies tamién, claro, porque Carminia ye mui paecida a l’Asturies medieval, y anque fantástica nótase muncho que ye Asturies.
Ye un xéneru mui distintu al de la to anterior novela, que yera una ucronía. ¿Qué tal el cambiu?
Bien, bien. Siempre tuvi claro que quería escribir dalgo de fantasía polo que dicía, que soi mui fan de Tolkien. Tengo más cosines escrites de fantasía, yá, de fechu esta novela ta fecha sobre un relatu col que gané un concursu equí en Morcín. Vamos, nun me dio más problema porque yá llevaba tiempu queriendo escribilu y nun me dio muncha lata. Bono, tuvi qu’entamala un par de vegaes, pero en xeneral toi de lleer muncho de fantasía y entós los recursos contrólolos bien y más o menos “piloto” del tema.
Anguaño los autores de fantasía falen muncho del “sistema de maxa” de les sos noveles, una parte importante ye tener claro cómo funciona. Pa la to novela, por embargu, creasti un sistema teolóxicu. ¿Cómo se t’ocurrió y qué pues contanos d’él?
Dientro d’esti tema de la fantasía, una de les coses que yo querdría esplorar ye’l tema de la maxa, el misticismu… Porque nun me gusta enfocar la maxa d’una manera cientifista o materialista como unos poderes midibles o cuantificables. Préstame que tenga un sentíu más sacru, más místicu. Y por eso tamién quería da-y un toque de teoloxía a la novela, y esta ta mui esplicada nos apéndices. Porque lliterariamente ye más guapo, tien un efectu mayor, ye más máxico; maxa más puro. Porque hai noveles, como The Name of the Wind de Patrick Rothfuss, que tienen maxa pero que ye como ciencia, ¿non?, nun tien gracia nenguna porque vas a la universidá, esplíquente como funciona y ye como facer matemátiques. Una cosa difícil pero que si s’esfuercia pue facelo tol mundu. Nun tien misteriu, ye complicao pero mundano, como la física cuántica. Nun tien esi calter de sacralidá y misticismu que por exemplo sí que tien en Tolkien, porque nél ta enfocada dende un puntu de vista relixosu y tien un venceyu a la divinidá que la sacraliza. Quería da-y esi toque de sacramentu, y por eso desendolqué la liturxa y la teoloxía. Pa mio idea quedó bastante bien, y tienes pehí la influyencia divina; ta Aramo, que ye’l Dios Padre, depués tán les fuercies del mal, los seres mitolóxicos tamién tienen una esplicación mística… y pienso que l’efectu que da a la novela ye guapu, misteriosu y sacramental.
¿Que pues contanos que tea por venir? ¿Tienes dalgún proyectu ente manes?
Sí, sí, tengo dellos ehí. Bono, ta pendiente de salir 1929, que tarda un poco en salir. Diéronme les perres rápido, eso sí, y ufiertáronme mil coses, esto d’Autores en Camín y… ba, pero la novela tarda un poco más. Que tamién ye normal porque les coses hai qu’editales, cola ilustración y mil coses. Amás mandáronmela pa revisala y taba d’esámenes, pero ta a la vuelta de la esquina yá. Depués toi agora yá con delles noveles. Toi con una mui especial que me ta prestando muncho facela… Nun voi dicir d’ella más qu’involucra carlistes y sectes paganes que quieren abrir portales al inframundu. Depués tengo pensao facer una sobre San Melchor pero dándo-y un toque pulp, dalgo de Vietnam intercalando la historia de San Melchor camudada pa efectos de la novela cola hestoria d’un misioneru posterior metanes la Guerra del Vietnam. Rollu pulp. Ye que d’él quería facer una novela porque ye un santu al que tengo devoción porque ye de Quirós, y amás la xente nun lu recuerda muncho, y prestábame face-y una novela. Pelo menos que saliere y que se-y referenciare. Y depués tengo dalguna otra pensada; una de tipu esperpénticu, al estilu Luces de bohemia, con sátira social del asturianismu… Y asina a lo pronto ye lo que tengo. De fantasía toi trabayando dalguna idea más porque con El cantar de Suaro Caínez quedé contentu pero quiero revisalu y facer más coses. Esplorarélu. Bono, y tengo tamién un relatu de vampiros qu’empecé cuando la Nueche d’Ánimes pero que nun lu acabé, y quiero retomalu porque pal pulp católicu paezme que’l tema de vampiros ye bastante afayadizu. La Rexenta contra Drácula ye una de les mios noveles preferíes, n’asturianu la que más, yo creo, y paezme que pueo aportar a esi tema. Ta bien que faiga dalgo nesi sen.
La novela El cantar de Suaro Caínez ta yá pa comprar nes llibreríes y na páxina web de Radagast, calcando equí.
