Aníbal González (Morea, Ayer, 1991 ta acabante d’asoleyar con Ediciones Trabe “Anatomía d’un Farfagón”, poemariu col qu’algamó’l premiu Asturies Xoven de Poesía 2021. El poemariu, ye, amás, el primer llibru asoleyáu por esti “Millennial” que reconoz que foi l’Andanciu’l que lu fixo volver a escribir. En Refuelgu! quiximos aprovechar la ocasión p’afondar con él nel procesu d’escritura, en cómo ta viendo les lletres asturianes actuales y, cómo non, en que mos desplicare un poco más qué ye lo que va atopar el llector n’ “anatomía d’un Farfagón”
¿Qué va atopar el llector n’“Anatomía d’un Farfagón”?
Pa min ye un esperimentu. Son 30 pieces bastante variaes, pero que tán articulaes col envís d’emburriar a reflexonar a quien les llea. Ye lliteratura cenciello, o pretende selo, anque haya dalguna referencia más específica.
Lo del farfagón o forfagón o forfogón o forfogón o… a ver, paisanos míos del alma, entendémonos anque camudemos les vocales. Y l’anatomía, pues porque rondábame’l títulu “Autopsia d’un farfagón”, d’un poema qu’escribí hai tiempu… El poema yera horrible, pero’l conceptu paicíame interesante y quixi emplegalu de títulu pal poemariu, pero cuando lu mandé a concursu veníamos del branu y foi un branu guapu pa min, asina que nun podía ser una autopsia yá. Había vida…
Anatomía, mui llibremente, porque ye investigar la fondigonada como forma de vida, y esi enunciáu pue lleese de munches formes: tien un aspectu tanto xeográficu, hestóricu, políticu… como tamién sicolóxicu (quiciás sobre too sicolóxicu).
¿Qué ye lo que te mueve a escribir? ¿Y a escribir poesía?
Siempres quixi escribir, anque nun lo facía en firme dende neñu y hasta la llocura pandémica de 2020 nun retomé. Taba bastante tocáu y sirvióme pa canalizar muncho de lo que me mordía per dientro. Entamé al traviés de les redes sociales a mou de terapia non buscada (o exhibicionismu emocional, nun sé), fui garrándo-y el gustu y resultó qu’había dalguna xente qu’esfrutaba coles mios palabres.
D’ehí p’alantre, fue too volao. Cuando ún se siente validáu y llexitimáu pa espresar lo que piensa, la maquinaria engrasa sola. Mesmo pa compartir allegríes y euforia que pa plasmar tristura, pa quexame a punta de razones (eso espero) o hasta cuando toi de mala hostia: escribir ayuda. Y reconozo que muéveme tanto’l pruyimientu de volcame en palabres como l’interés de la xente no que tenga que dicir.
Aparte, facelo en forma poética abúltame muncho más cenciello y más natural, toi cómodu. ¿Que rima? Guai. ¿Que non, pero suena bien y préstame? Perfeuto tamién.
Siempres quixi escribir, anque nun lo facía en firme dende neñu y hasta la llocura pandémica de 2020 nun retomé
Nun siendo nengún espertu, tengo una idea bastante difusa de la poesía: últimamente, en gran midida influyíu por Ánxel Á. Llano, paezme más una forma de tar y de rellacionase col mundiu. Y yá pensándolo como formatu lliterariu, abúltame que ye too prau anque haya artos y ortigues pentemedies: porque nun veo sebe nin la quiero ver, pel momentu (sí, soi de los qu’usen metáfores de monte anque nun tenga vaques ni gochos ni pites, siquiera).
L’añu anterior ganare Miguel Monteavaro’l mesmu gallardón, l’Asturies Xoven de poesía; va unos años Diego Solís algamábalu tamién… ¿Paez-y qu’hai un mayor reconocimientu agora a la creación n’asturianu o ye cenciellamente que ye mayor la producción lliteraria n’asturianu?
Tocantes lo del reconocimientu, nun sabría dicir. Lo que sí pienso ye qu’hai movimientu porque veo xente andando: nun sé si más qu’enantes, pero hai xente lleendo y tamién escribiendo n’asturianu. Xente mayor, pero tamién xente mui mozo (yo nun lo soi tanto, anque’l premiu lo diga). Pamidea que les autores de xeneraciones que vinieron enantes de nós (y que siguen n’activu en munchos casos) tuvieron l’aciertu de dexamos bien pisáu el camín pa que güei seya posible facer lo que facemos y que la lliteratura n’asturianu tenga más repercusión.
Agora lo que toca ye, como fai Monteavaro, por exemplu, y muncha otra xente lleva faciendo dende hai cuantayá, garrar voz propia y falar de les coses que mos esmolecen, que mos mueven y mos emocionen a nós.
Les autores de xeneraciones que vinieron enantes de nós tuvieron l’aciertu de dexamos bien pisáu el camín pa que güei seya posible facer lo que facemos
¿Cómo ye’l procesu d’escritura? ¿Cuánto te llevó facer el poemariu?
Un putu caos. El procesu ye que nun hai procesu como tal. Nun soi de los que se sienten a escribir a diariu como exerciciu, tampoco pueo tomámelo como un trabayu al que dedica-y un tiempu estipuláu, por dellos motivos.
Nesti casu, la mayoría de pieces vienen inspiraes por semeyes feches mientres la cuarentena (dalgunes enantes, otres, dempués; munches nin siquiera les fice yo) que me paicía que teníen daqué granible nel planu conceptual, aparte de ser visualmente guapes. La receta sedría dalgo asina: una semeya suxerente, dalguna idea a medio desendolcar, una pingarata de sentimientos, dexamos reposar y reservamos. Cuando cuadre (cuando apeteza) tórnase a revisitar tantes veces como seya y retócase lo que proceda.
En tiempu… Pues hai pieces de 2019 y hai pieces de 2021, asina qu’igual pue dicise que son 2 años. Escribí muncho más mientres esi tiempu, coses dignes que salieron y que tán pa salir n’otros medios (Formientu, n’especial) y coses que son morralla, pero estes 30 pieces foron la mio apuesta pa esti primer llibru. Eso sí, lo que foi el procesu de componer el poemariu duró esautamente once hores y foi d’una sentada. Acabé galdíu, pero feliz.
¿Qué conseyos daríes a otra xente mozo pero que tea empezando?
Conseyos vendo que pa min nun tengo… Pues que ye too ponese.
Diría-yos que nun s’esmolezan por nada, qu’escriban lo que-yos dea pola gana y piquen puertes, manden a concursos, a revistes, que compartan por redes sociales, editoriales… Que vayan a too. Y que la xente ye más bonal y más xeneroso de lo que mos venden ciertos discursos: tu fai coses, que ye mentira eso de qu’el d’al llau siempres prefier que fracasemos toes a que trunfe dalguién que nun sea elli. Cabrones y envidiosos hebo siempres en tolos llaos, pero la mayoría de la xente allégrase pol bien ayenu y presta-y que se fagan coses. La mio esperiencia tá siendo esa, cuando menos nel ámbitu más cercanu.
la mayoría de la xente allégrase pol bien ayenu y presta-y que se fagan coses
¿Cómo ves la poesía n’asturianu contemporánea? ¿Cambió muncho nes últimes décades a nivel temático o de puxu?
R. Nun sabría dicir ensin tirame’l pistu, porque yá digo que nun soi un gran llector de poesía (o nun lo fui hasta hai bien poco)… Pero paezme que la mayoría de temes son los de siempres: l’amor, la señaldá, la naturaleza, los problemes sociales… Agora qu’igual el tonu xeneral sí tá cambiando. Dixe hai poco n’otru llau que les xeneraciones más moces somos más irreverentes y menos solemnes que les del surdimientu ochenteru, por exemplu. Bono, güei voi romper cola xeneralización: ehí tán Nel Amaro o Dolfo Camilo, por dicir dos autores que tengo frescos. Si ellos nun son irreverentes, yá me diréis…
Nesi sen, nun pienso que’l mio poemariu seya mui revolucionariu, vaya. Pero tampoco ye necesario facer siempres la última novedá nunca vista enantes. Lo que sí ye, ye mui personal, y eso sí m’abulta necesario al falar de poesía.
” ye mui personal, y eso sí m’abulta necesario al falar de poesía.”
Y el conxuntu de la lliteratura asturiana en xeneral… ¿Qué impresión te da?
Pues paezme qué ta bastante sana, mirándola como conxuntu, anque dalgunes estayes tean mui poco esploraes. Hai munches obres nueves (estos años tan duros paez qu’emburriaron a muncha xente a producir) y mui mui variaes. Hai lliteratura pa tolos públicos de toles edaes y con (casi) tolos gustos lliterarios. Y confío en qu’esi ‘casi’ tea en víes desapaecer gracies a iniciatives como la d’ Ediciones Radagast, enfotada en xéneros más populares y menos andaos na nuesa lliteratura (ciencia-ficción, fantasía, terror, etc).
Autores nueves, editoriales nueves, xéneros nuevos… que sumen a lo que ya había y que siguirá habiendo. Pamidea que si lo vemos asina, si somos capaces a entendenos, a xenerar un diálogu y a valorar la diversidá, igual sí que pue llamase salú.
“si somos capaces a entendenos, a xenerar un diálogu y a valorar la diversidá, igual sí que pue llamase salú”
Hebo o hai un alderique recurrente sobre si la lliteratura tien qu’aspirar a la profesionalización: ¿Qué opinión tienes?
Pues ye un tema, eh. Soi de la opinión de que la lliteratura, y les actividaes artístiques en xeneral, tienen de profesionalizase. A min gustaríame dicir que soi escritor (escribir, escribo…) pero si mos ponemos nel planu llaboral, de subsistencia, pues resulta que soi camareru.
Nun quiero dicir que ‘yes lo que faes pa comer’, entiéndase, pero nel mundiu real, el trabayu ye una actividá que consume munchísima enerxía física y mental y, sobre too, consume tiempu. Otra xente ye mayestra o bióloga o lo que seya; cada oficiu tien sus coses… Aporta pero tamién interfier, supongo.
Toi entamando nésto de la escritura pero gustaríame muncho, n’un futuru, conquistar el pan cola pallabra y non cola bandexa y l’abridor.
Agora que… ¿Quién atopa mecenes o promotores néstos tiempos? Tampoco creo na meritocracia, por eso: ¿nun ye meyor invertir como sociedá, yá que tá asina montao, y que la posibilidá de dedicase al arte como oficiu seya dalgo algamable ensin falta de tener perres d’antemano o de que’l discursu que s’exhibe interese a quien sí les tenga?
Toi entamando nésto de la escritura pero gustaríame muncho, nun futuru, conquistar el pan cola pallabra y non cola bandexa y l’abridor.
¿En qué proyeutu lliterariu tas metíu actualmente?
Pues sigo escribiendo poesía a un ritmu aceutable, anque nun tengo muncha priesa por asoleyala; quiero que repose.
Tamién ando intentando engañar a un collaciu pa musicar dalgunes pieces, entá nun hai nada en firme pero apetezme muncho.
Tocantes a la prosa, tengo un par de rellatos curtios per’hí circulando: ún a concursu y l’otru, pa un proyeutu mui especial del que nun procede falar entá. Esti últimu foi una ufierta pola que toi mui agradecíu y resulta qu’ensin proponémelo creo qu’abrí un mundiu nel qu’encuadrar munches de les esmoliciones que nun salen tán fluyíes en formatu poéticu. Esto ye dicir: rellatos curtios interconectaos, ¡¡p’allá voi!!
Podéis mercar “Anatomía d’un Farfagón” na páxina web d’Ediciones Trabe, calcando equí.
