A puntu tenemos d’estrenase nos cines Cocaine Bear (en castellanu, Oso vicioso), una película dirixida por Elizabeth Banks y que, por estraño que paeza, ta basada en fechos reales. Bono, yá sabemos qu’estes coses puen poneles y llueu tomase unes cuantes llibertaes, pero paez ser que, en 1985, un osu de Georgia atopó nada menos qu’una tonelada de cocaína, y nun se-y ocurrió otra cosa que ponese hasta arriba d’ello. Esta peculiar hestoria conviértese agora nuna comedia d’horror, col recién fináu Ray Liotta nel elencu, y l’ésitu en redes yá primero de salir foi talu qu’abulta que tien potencial de convertise hasta nun soxéneru nuevu.
De mano, tenemos la noticia recién de qu’en Nueva Zelanda atoparon más de trés tonelaes de cocaína, flotando al debalu na mar, que popularizó la idea en redes d’una continuación titulada Cocaine Shark. Esto llegó a la mesma Elizabeth Banks, que confirmó nuna entrevista que-y encantaría facer esa película de contar con un bon guión. Per otru llau, la productora de mockbusters The Asylum (si nun sabéis qué ye un mockbuster, esplicólo equí Adrián Carbayales) acaba d’anunciar Attack of the Meth Gator, la versión cutrona de Cocaine Bear con un caimán puestu de metanfetamina, y que van tener pa sacar yá esti branu.
¿Cómo lo veis? ¿Llámavos, paezvos la mayor fatada de los últimos tiempos… o dambes dos coses? Dexámosvos pensalo, y p’ayudavos a formavos una opinión enllazámosvos l’avance de la película l’osu (calcando equí) y los cartelos de les dos que tán yá confirmaes.
