Como vos dicíemos ayeri (y si nun lo lleísti pues velo equí), Crunchyroll anunció animes a esgaya que tien a puntu d’estrenar. Tantos que decidimos dosificar la noticia en dos díes pa que nun saturareis a videos y dar a caún la importancia que daveres tien.
¡Vamos siguir con ello!
Masamune-kun no Revenge R / Masamune-kun’s Revenge R
Continuación de Masamune-kun no Revenge (ensin R), esperada dende que la primer parte s’estrenó allá en 2017, por fin apuerta la continuación d’esta comedia romántica basada nel shōnen de Takeoka Hazuki. Cuenta la hestoria d’un neñu fondón al qu’esbardia la rapacina que-y gusta, pero ocho años dempués vuelve fechu tou un figurín. Estrénase en primavera, tovía nun s’especificó cuándo, y pues ver l’avance calcando equí.
Niehime to Kemono no Ou / Sacrificial Princess and the King of Beasts
Serie basada nel shōjo de Tomofuji Yū. El Rei de les Besties y los Demoños recibe regularmente una muyer como sacrificiu, pa comela y demostrar asina’l dominiu sobre los humanos. Por embargu, la noventena novena moza que-y dan d’ufrienda fai-y rebelguinos, lo que por supuestu va facer temblar tol status quo. Estrénase n’abril de 2023 y podéis ver l’avance calcando equí.
The Legend of Heroes: Sen no Kiseki Northern War / The Legend of Heroes: Trails of Cold Steel Northern War
Un anime que, a diferencia de la mayoría, nun ta basáu nun manga o una serie de noveles llixeres, sinón na franquicia de videoxuegos Trails, siendo en concreto una hestoria ambientada ente’l segundu y el terceru. Metá la guerra ente los países ficticios d’Erebonia y Ambria’l Norte, y trata sobre una moza d’Ambria que se xune a los mercenarios pa protexer el so pueblu. L’entemez ente ficción científica y fantasía resulta mui llamaderu, la serie estrénase en xineru de 2023, y podéis ver l’avance equí.
