Crunchyroll, la canal de streaming que yá anunció l’otru día, nel NYC Anime, un montonáu de novedaes (les que pues ver calcando equí). Agora, na Anime Frontier, en Texas, anuncia otra fornada tovía más grande de series que tán yá pa estrenar. ¿Queréis saber de qué van ? Pos vamos empezar a contávoslos.
Benriya Saitō-san, Isekai ni Iku / Handyman Saitoi in Another World
Basáu nel manga del mesmu nome d’Ichitomo Kazutomo, ye un isekai p’adultos sobre un rapaz que tien una vida mui normalina trabayando como mozu de caltenimientu, pero un día de sópitu espierta nun mundu de mazmorréu. Y ye ellí onde va descubrur lo útiles que son les sos habilidaes profesionales. Sal yá en xineru, y podéis ver l’avance calcando equí.
Mononogatari / Malevolant Spirits: Mononogatari
El popular seinen d’Onigunsō tien por fin adautación al anime. Los espíritus son a algamar esti mundu poseyendo artefautos, el clan Seoname encárgase de devolvelos a allá d’onde vinieron. Ún de los miembros, Hyōma, failo d’una manera demasiao agresiva, conque’l güelu lu manda a vivir con una rapaza que convive con ún d’estos seres. Estrénase tamién en xineru, y podéis ver l’avance calcando equí.
Tondemo Sukiru de Isekai Hōrō Meshi / Campfire Cooking in Another Worldwith My Absurd Skill
Basáu nuna serie de noveles llixeres d’Eguchi Ren, y que tamién s’adautaron a manga va unos años, apuerta esti anime sobre un puntu del montón qu’un día apaez nun mundu del estilu de los RPGs cola habilidá de facer pidíos online. Gracies a ello, va facer unos platos pimpanos a base de los monstruos que tropieza. Estrénase en nada, en xineru, y podéis ver l’avance equí.
Yūsha ga Shinda! / The Legendary Hero Is Dead!
Touka ye un granxeru un poco gochu que suaña con ser un héroe… hasta que, por accidente, mata al héroe de verdá y, nun se sabe mui bien como, acaba nel so cuerpu. El shōnen de Subaruichi estrénase n’abril de 2023, y podéis ver un avance (mui pero que mui curtín) calcando equí.
Y quédennos otros cuantos, conque mañana vamos siguir contándovos. ¡Alcordáivos de visitanos de nueves!
