Va yá años (dende 2017, nada menos) que se fala d’una pondera de Star Trek: Discovery, y que taría centrada na seición d’operaciones secretes (y menos étiques) de la Federación, la llamada Seición 31. Y anque paecía que quedara pa prau, porque foi atrasándose, llegó l’andanciu y dempués escomenzaron a falar d’otra pondera, qu’acabó convirtiéndose na precuela de la serie orixinal Star Trek: Strange New Worlds, agora anúnciennos una película cola premisa orixinal.
Nos primeros minutos de Star Trek: Discovery vemos cómo muerre la capitana de la Federación Phillipa Georgiou (interpretada por Michelle Yeoh), pero unos capítulos más tarde, nesa mesma temporada, descubrimos que la so doblu del “universu espeyu” (realidá alternativa que tien salío na serie dende los años sesenta) ye una malvada emperadora galáctica. Por una serie d’asocedíos acaba nel nuesu universu, y, en viendo les sos cualidaes y falta de remilgos, la Seición 31 llevántala.
Bien , pos como dicíemos, por fin vamos saber de les sos correríes nuna película pa la canal de streaming Paramount + que daría pasu, según dicen en The Hollywood Reporter (la noticia orixinal, equí), a una “Fase 2” del universu televisivu de Star Trek, una qu’incluyiría sacar una película nueva cada dos años. La idea de volver el proyeutu de serie una película vendría de la certeza que tenía Alex Kurtzman, responsable de la franquicia, de que Yeoh ganaría un Oscar por Everything Everywhere All at Once, lo que provocaría dificultaes pa que-y cuadrara l’axenda pa los tiempos que pide una serie.
Poco más sabemos d’esta película, nin siquiera cuándo ye la estrena, pero sí que la propia Yeoh la describe como un entemez de Guardians of the Galaxy y Mission: Impossible. Contámosvos más cuando sepamos.
