Acaba d’escomenzar la llamada Star Wars Celebration, y nella yá anunciaron la preparación d’unes cuantes películes nueves de la saga. Esto ye un alliviu pa munchos fans, porque, por si nun lo recordáis (contábamoslo equí), Disney llevaba un tiempu replanificando qué facer coles más importantes de les sos franquicies, sobre manera Marvel y Star Wars. Y ye, que como yá tienen comentao, paecía-yos que taben sobreesplotándoles, y qu’esto restaba efeutu a cada anunciu nuevu y diba deshinchándoles.
Asina, mientres que les películes anunciaes con anterioridá, la de Patty Jenkins (Rogue Squadron), la de Kevin Feige (que diba ser la primera d’una triloxía nueva) y la de Damon Lindelof diben cayendo, a los fans yá namás-yos quedaba facese ilusiones col únicu proyeutu que paecía quedar en pie, el de Taika Waititi, y del que tovía namás sabemos que de xuru’l direutor va dexar nél la so buelga personal. Por embargu, esto cambia güei, porque, como dicíemos, na SWC anuncien otres trés películes bien distintes ente elles, y coles que muestren que tán apostando pola diversificación y la esplotación de requexos distintos del universu.
La que más espectación creó foi la vuelta, como pudistis aldovinar pola nuesa portada, de Daisy Ridley como Rey, nuna continuación de la tercer triloxía na que la van poner al cargu d’una xeneración nueva de jedis. Paez ser que taría basada nel guión nel que taba trabayando Lindelof y va dirixila Sharmeen Obaid-Chinoy, pero de momentu nun sabemos más d’ella, nin siquiera’l títulu.
Per otru llau, James Mangold (Logan, The Call of the Wild) va dirixir una “precuela” na que va contanos cómo yera l’universu de Star Wars nada menos que venticinco mil años enantes de la primer película, prometiendo dalgo “bíblico” al estilu de Los diez mandamientos. ¿Película nueva pa poner en Selmana Santa, quiciabes? El casu ye que va adientrase nuna mitoloxía qu’hasta agora namás se tien esplorao nel Universu Espandíu (cómics y noveles), pero, col borrón y cuenta nueva que fizo Disney de lo que teníen construyío nesti, nun sabemos si va tirar polo mesmo o por dalgo dafechu nuevo.
Y, por último, tamién vamos tener una tercer película de Dave Filoni, el direutor creativu de Lucasfilm (primero productor de Star Wars Rebels) y qu’agora quier entamala con un cruz apoteósicu ente les series de Disney + que tien a cargu: The Mandalorian, The Book of Boba Fett y Ashoka.
