En cuantes que James Gunn (Guardians of the Galaxy, Peacemaker) se fizo col puestu de nuevu direutor creativu de DC Studios, quixo anunciar un gran plan con milenta películes que tán de camín, y que tienen una pinta bárbara, pa mexar y nun echar gota. Ente elles, una de les que más llamó l’atención foi Superman: Legacy, qu’el mesmu Gunn va guionizar y dirixir y na que quier dar una visión nueva del Últimu Fíu de Krypton. Pa ello yá nun cuenta con Henry Cavill, y por ello va tiempu que se tán faciendo cábales sobre quién va ser la estrella que va facer de Clark… y, por supuestu, quién de la inseparable Lois. De fechu, nos rumores que se diben filtriando teníen como nominaos siempre pareyes, como si tuvieren descubierto nos actores una química especial y escoyer ún diba unío a escoyer tamién l’otru.
El casu ye que yá tienen la eleición tomada, ¡y vamos contávosla darréu!
Como Superman/Clark Kent vamos tener a David Corenswet, que vos pue sonar de velu en House of Cards o, va menos, protagonizando la miniserie de Netflix Hollywood y la película de mieu Pearl. Mientres, de Lois Lane, yá sabemos que va facer Rachel Brosnahan, que si vos suena lo más seguro ye que seya porque tien sío la protagonista de la serie de comedia y drama Marvelous Mrs. Maisel.
Ye posible, tamién que nun vos suene nengún d’ellos. La verdá que la escoyeta nun ye ente grandes superestrelles, como suel pasar con otres películes de superhéroes. Ente les opciones que baraxaben, de fechu, taben actores más conocíos como Nicholas Holt (que tien salío en delles películes de X-Men como Cyclops, y tamién en Mad Max: Fury Road) o Emma Mackey (la estrella de Sex Education y qu’agora va salir en Barbie, col cachondéu que trai consigo’l so paecíu que tol mundu-y ve con Margott Robbie), y, por embargu, Gunn quixo más estos. ¿Ye porque namás ta pensando en quién-y paez más apropiáu pa cada papel, ensin mirar quién ye más llamaderu? ¿O busca escoyer adré actores poco conocíos pa que brillen más los personaxes? Eses son unes respuestes que tovía nun podemos dar. ¡Ah! Y hai otra más… ¿Qué actores van escoyer pa facer de los villanos, que polo que se sabe van ser el malváu científicu y empresariu Lex Luthor y el xeniu estraterrestre Brainiac? Sobre estos, de momentu, nun hai más que rumores.
Superman: Legacy espérase pa xunetu de 2025, conque tovía va haber qu’esperar pa saber más coses d’ella.
