La versión anovada d’El planeta de los simios, esa qu’escomenzó con Rise of the Planet of the Apes, fízolo cronolóxicamente. Empezó pel principiu. Pue paecer una babayada indicar esto, pero ye que la saga orixinal, la de la película de Charlton Heston, presentábanos esi futuru llonxanu y apocalípticu (el del spoiler yá conocíu por toos, cola Estatua de la Llibertá medio soterrada), y yá, nes entregues siguientes, vamos viendo cómo va tresformándose’l mundu presente hasta llegar a esi puntu.

Por embargu, como dicíemos, na versión nueva, a la que dieron l’arranque en 2011, vamos n’orde, dende la rebelión de César y, adulces, acercándonos a esi futuru terrible pal ser humanu, que se convierte nuna bestia de carga de los nuevos amos de la Tierra. Y agora que llegamos a la cuarta entrega, Kingdom of the Planet of the Apes, vemos un mundu que bien tien un gran aldéu a esi futuru, cola natura comiendo los nicios que queden de qu’una vegada hubo una civilización humana.

Yá pasaron xeneraciones dende la última entrega, y ye por eso que la película nueva nun va compartir personaxes con nenguna de les anteriores. Bono, tenemos un tal Cornelius (interpretáu por Owen Teague) y anque teníemos un personaxe llamáu asina nes anteriores, el pasu de tantu tiempu paez indicar qu’esti nun ye esi, sinón que seya la versión nueva del antiguu Cornelius, el que salió en trés de les películes clásiques. Tamién tenemos otru César (interpretáu por Kevin Durand), pero ún mui distintu al que llevó la victoria a los simios y que busca tecnoloxía humana cola qu’imponese a otro clanes.

El casu ye que con esta yá son cuatro les películes que reversionen esta saga clásica, y too ensin tener de recurrir a la llegada de George Taylor y demás astronautes del sieglu XX a esi futuru espantible. Abulta que, mientres tenga ésitu, tenemos monos pa ratu.

Mientres esperamos a que llegue la película en febreru, dexámosvos l’avance acabante salir de fornu calcando equí.

Leave a Reply

La to direición de corréu nun va espublizase. Los campos riquíos márquense con *