El xigante RIOT anunciara va años que diba esparder los sos productos y metese n’estayes nueves venceyaes al League of Legends (exemplu d’esto ye’l grupu de k-pop KDA o Giants). Ente estes nueves estayes taba’l facer una serie venceyada a los personaxes y les histories que se cunten nel resquiebru del invocador.
Tres más de cinco años de desendolcu, la serie asoleyóse en Netflix en payares de 2021. Con una primer temporada d’ocho capítulos qu’había qu’entender como l’entamu d’un nuevu universu nel mundu de la animación. Sí, animación, porque magar la tendencia qu’hai nos caberos años a facer series y películes basaes en videoxuegos, cómics y demás con persones reales, RIOT decidió siguir la fórmula d’ésitos como Spiderman: un nuevu universu y facer una serie d’animación, qu’amás entemez l’animación tradicional cola virtual.
El resultáu ye lo que munchos vienen considerando una obra casi perfecta, tanto nos aspeutos téunicos como nel desendolcu de la historia. Nun se decataron por Ahri, o por Garen o Katarina: escoyeron el mundu de Piltolver y Zaun, al que pertenecen personaxes míticos como Caitlyn, VI o la perconocida Jinx. Son elles les principales protagonistes de la historia xunto con Jayce, Heimerdinger o Viktor.
Con toques d’steampunk, la serie cúntanos cómo hai realidaes perdistintes neses dos ciudaes: Piltover, un mundu venceyáu al progresu, lluminosu con colores calientes, onde’l principal motor económicu ye la ciencia y los avances teunolóxicos…frente a la ciudá soterraña de Zaun, escura y con tonos fríos, onde una población bien numberosa puxa por sobrevivir como pue, faciendo toa mena de trabayos y actividaes na llende de la llegalidá. De primeres ye imposible movese d’un mundu a otru (anque, cómo non, hai traficantes y de too), sacantes delles escepciones. Esa ciudá yá tentó de revoluciona más d’una vez, ensin ésitu, lo que fexo que s’endureciera la vida d’abaxo.
Agora Zaun ta en camín d’una nueva revolución y VI y Powder, dos hermanes criaes por Vander, suañen con salir al esterior (ye habitual qu’haya incursiones pa robar). Vander foi un de los revolucionarios de la anterior xunto con Silco, y tamién ye’l mediador anguaño ente eses dos realidaes. Silco, mentanto, trama volver a facer una sublevación. Too esto (alerta spoiler), desendolca la muerte de Vander, la encarcelación de VI y la llocura de Powder, que pasa a tar al serviciu de Silco.
Cuando pasen los años VI ye lliberada por Caitlyn, una soldáu de familia noble que nun suaña más que con destacar y facer xusticia. VI va vese na tesitura de tener qu’escoyer ente ayudar a la so hermana y a la ciudá soterraña o acompañar a Caitlyn, pola que tien sentimientos que van más allá de l’amistá.
Esta historia pasa al empar que la de Echo, ún de los habitantes de Zaun que llucha por ameyorar la vida ellí abaxo, y sobretoo la de los neños; y tamién al empar que la de Jayce y Viktor, dos de los científicos de la ciudá que tan investigando la maxa Hextech.
Magar que puen paecer munches histories al empar, los personaxes tienen rellación pente sí y al final toes les histories acaben por xunise a lo cabero de la temporada, que tien un final dramáticu y bastante abiertu.
L’éxitu ablucante de la serie desendolcó en que yá tea en producción una segunda temporada, que va salir, si non hai torgues, a lo cabero de 2023.
