Tres de la fundación de los Premios Fontenebrosa na anterior y primer edición de l’AsturCON (premiando col de la 0 Edición al autor pol que se-y dieron esi nome, Vicente García Oliva, a mou de reconocimientu al so aporte a la lliteratura de xéneru), agora la organización anuncia bases y plazu pa presentar candidatures a novela ganadora d’esta edición. Yá seya una novela en castellanu o n’asturianu, pos les obres de dambes dos llingües compiten nuna única categoría, esta tien de tar publicada a lo llargo de 2022, y ser de xéneru fantásticu, ficción científica o horror. Pero pa nun repetinos demasiao, ponémosvos darréu les bases que la organización anuncia:
Premios lliterarios Fontenebrosa otorgaos por AsturCON.
L’Alcuentru de Fantasía AsturCON (“AsturCON” p’acurtiar) creó na primer edición el Premiu Fontenebrosa, pa premiar les meyores noveles de ficción científica/fantasía/horror y xéneros vecinos publicaes por autores y/o editoriales asturianos o residentes nel Principáu l’añu anterior.
El premiu d’esti añu va corresponder a obres publicaes dende l’ún de xineru al trenta y ún d’avientu del añu 2022.
Va haber una categoría:
Meyor novela orixinal en castellanu o asturianu publicada la primer vegada nel añu natural anterior.
Pa ello, la organización d’AsturCON, formada por Dam Fernández, Xon de la Campa y Adrián Carbayales, va ser el xuráu de les obres presentaes al premiu. La organización guárdase’l drechu a solicitar la participación de más miembros del xuráu si asina lo consideren oportuno.
Pa garantizar la independencia del premiu, los miembros del xuráu van quitase de presentar obres firmaes por ellos. Nel casu de que, d’otra manera, presentaren dalguna obra, esta quedaría automáticamente descalificada.
Van almitise a concursu les noveles publicaes en papel o n’electrónico y van poder participar tanto les publicaes por editoriales como les autoeditaes. L’únicu requisitu ye que dispongan d’ISBN.
Presentación de manuscritos:
Van habilitase dos modelos de presentación de manuscritos:
Llibru físicu: únviense trés copies físiques. Estes copies pasaríen a formar parte de los premios. D’esta manera va poder comprobase de primer mano l’altu nivel de competencia que tuvo. La dirección a la qu’han unviase estes obres ye la siguiente:
PREMIU FONTENEBROSA
ATT DAMIÁN FERNÁNDEZ
CALLE DE LA TECNOLOGÍA Nº126
CP 33691, XIXÓN (ASTURIES)
Llibru electrónicu: únviase de manera privada a asturcon@quantamedia.es. Escríbese nel asuntu del corréu’l mensaxe siguiente:
PREMIU FONTENEBROSA – Nome de la novela.
Como aclaración, nun ye preciso que los llibros editaos en papel s’unvien nesi formatu. El participante pue unvialu en formatu electrónicu (EPUB preferible) ensin nengún tipu de problema.
Unos díes enantes de l’AsturCON vamos facer públicos los nomes de les finalistes de cada categoría.
El premiu va anunciase na Cena d’Honor que va organizase’l sábadu venticinco de payares de 2023.
El premiu va consistir en lloa y gloria pa ellos, y un troféu épicu que poder llucir con arguyu nos llares, redes sociales y grupos de Whatsapp. Tamién nos llibros atropaos ente’l restu de participantes y aquellos que les editoriales amigues (Radagast, Trabe, Orpheus, Sportula, HT Publisher y Quanta Media) tengan a bien facenos llegar como donación al certame.
Y si queréis más información al respeutive o tocántenes a l’AsturCON, podéis visitar la so páxina calcando equí.
