Non. Asturies nun ye Nueva York, nin San Francisco o Los Ángeles. Nun hai nengún GTA ambientáu n’Uviéu (Pero… ¿Y lo que prestaría?) nin nengún Assassin’s Creed en Xixón. Tampoco nun sal nel Call of Duyy la Batalla del Mazucu, nin hai en nengún Battlefield una pantalla na que podamos atacar Uviéu coles fuercies mineres revolucionaries n’Ochobre de 1934. Ta claro que ye un desperdiciu nun aprovechar estes oportunidaes y en Refuelgu.com tamos seguros de que les coses van cambiar en dalgún momentu, pos la historia que tien Asturies da pa muncho en narratives como les que se pueden facer nos videoxuegos.
Sicasí, hai daqué d’esperanza en too esto. Asturies yá sal nos videoxuegos, anque siempre ye, hai que lo reconocer, d’un mou más bien secundariu, cuasi accidental. Pero si restolamos bien per Steam, vamos poder atopar verdaderes xoyes nes qu’Asturies apaez. ¿Cuáles? Ta claro qu’asina, de sutrucu, ye difícil imaxinar nengún títulu onde salga siquiera Uviéu o Xixón. Vamos dir de menos a mas y vamos entamar pelo más cenciello.
L’Aeropuertu d’Asturies nel Flight Simulator
L’Aeropuertu d’Asturies, “Ranón” o “Santiago del Monte” como lu llamamos siempre; ye un llugar al que se puede volar y dende’l que se puede despegar. La pista 29-11 ta asitiada xunto a la mar nel mesmu llugar y tien toles pistes de “taxi” peles que dir a la pista principal, amás de les ramples d’accesu a los aviones. Hai bien de vídeos n’internet del aeropuertu d’Asturies y, si tenéis el FSX convidámosvos a que lu miréis. Esto nun ye nengún favor a Asturies. El videoxuegu amuesa con tou detalle toles pistes de tolos aeropuertos del mundu, nos cinco continentes.
Ye importante recordar que, normalmente, esti añu 2020 ye cuando saldrá a la venta’l nuevu “Flight Simulator 2020”, una versión enforma más moderna del FSX que va contar con unos gráficos muncho meyores que los precedentes y na que, según dicen, vamos ser quienes a poder ver “la nuesa propia casa“. Ta claro qu’estes promeses abúltennos demasiao grandes, sobre too si tenemos en cuenta que’l xuegu Flight Simulator 2020 tien la intención de cubrir la totalidá del mundu. Pero ye una prometedora presencia d’Asturies nel aeropuertu.
Bonus track: L'aeródromu de Llamorgal tamién apaez nel xuegu y vais poder despegar y aterrizar d'él aviones de toa triba. Eso sí, tenéi en cuenta que tien menos llargor la pista que la del aeropuertu, polo que vos aconseyamos que namás empleguéis les avionetuques más pequeñes.
El Molinón y el Carlos Tartiere nel FIFA
Ye facer un poco de trampa, porque en realidá Asturies nun sal, namás los campos de fútbol. Pero en xuegos como’l FIFA ye bien posible xugar col Real Uviéu o col Sporting de Xixón y, como ye natural, xugar nel Carlos Tartiere y n’El Molinón. Lo cierto ye que’l FIFA representa mui bien l’ambiente y la disposición de les grades y del terrén de xuegu. La xente qu’anima al equipu ta vistío colos colores y lleven hasta bunfandes y banderoles.
Al paecer, nun ye namás l’estadiu del Uviéu y el del Sporting los que se representen, sinón, tamién, los de bien d’equipos de categoríes inferiores como l’UP Llangreu o’l Caudal de Mieres.
El (¿peaxe?) del Güerna nel Euro Truck Simulator 2
L’Euro Truck Simulator 2 ye un d’esos xuegos estraños que-yos gusten a poca xente pero que tienen bien de siguidores. Hai tanta xente a la que-y gusta esta propuesta que nun sacaron namás el 1, sinón que tamién sacaron la segunda versión y con cantidá de mods y d’ampliaciones pa representar otres partes del mundu. L’Euro Truck Simulator 2 ye un xuegu bien cenciellu nel conceutu: Yes un camioneru. Yes un camioneru que va d’una ciudá a otra y d’un país a otru d’Europa (sí, el nome ye esplícitu) llevando mercancía y ganando perres.
Asturies sal, al paecer, nel ETS2. Onde podemos ver qu’hai n’internet vídeos como’l d’esti youtuber onde lleguen al Güerna dende Llión. Habrá que ver el nivel de detalle y la representación que se fai o si son paisaxes xenéricos que “s’aprosimen” a lo que ye la realidá Asturies. Pel momentu vimos dos lletreros cola toponimia asturiana deturpada. ¿Habrá más? ¿Podremos ver “Xixón” en cuenta de “Gijón” nel Euro Truck Simulator 3? Esperemos que sí. Y esperemos que pa esi momentu, el peaxe del Güerna seya yá historia…
Europa Universalis IV (El xuegu que pa xugar a él fai falta un master)
Si dicimos “Europa Universalis IV” la población divídese en trés grupos: Un grupu que diz “¡Cómo presta!”, otru que diz “¡Vade retro!” y un terceru que responderá “¿Qué ye, ho?”. Si tais nesti últimu, contavos que lo meyor y lo peor que se pue dicir d’Europa Universalis IV ye que ye un xuegu percompletu y con cantidá de funcionalidaes, con un realismu enforma grande y que representa fielmente lo que pue ser tar a los mandos d’un Estáu (o d’una ciudá-estáu, o d’un imperiu…) na Edá Moderna.
Y ye que cuando dicimos que ye lo meyor y lo peor, queremos dicir qu’Europa Universalis IV ye un xuegu percomplexu al que ye bien difícil xugar (y más tovía con un país como Asturies); pero que, la xente que ye a dominalu, pue echar nél hores y hores. Tocante a Asturies, hai que dicir qu’equí’l xuegu desarróllala bien. Esti xuegu, qu’entama en 1444, tien a Asturies y a Llión como parte de Castiella. Pero son “provincies” que tienen otra cultura. Nesti casu, Asturies tien cultura y llingua llioneses. Y pue convertise nun país independiente (tanto Asturies sola, como Asturies dientro d’un Reinu de Llión)
Los rasgos d’Asturies n’Europa Universalis IV
N’Europa Universalis IV, Asturies tien una serie de “Rasgos” o “idees” que puen emplegase p’asumir como “doctrina d’estáu” y qu’apurren una serie de ventayes o modificadores al país. Nel casu asturianu sedríen los que vienen darréu.
- Heritage of the Reconquista: +0.5% Yearly Army Traditions
- Leonese Cortes: -1 National Unrest
- Conquest of the New World: +1 Colonists
- School of Salamanca: -10% Idea Cost
- Expand the Leonese Navy: +25% Navy Force Limit Modifier
- Patronize the Leonese Language: +1 Yearly Prestige
- Leonese Nationalism: +10% Infantry Combat Ability
Llámanos l’atención, pa bien, que les dos grandes aportaciones que fixo’l Reinu de Llión a la historia y la cultura universal, Les Cortes de 1188, el primer parllamentu européu, y la llingua llionesa, tean representaos n’Europa Universalis IV. Polo que mos paez que quiciabes seya’l xuegu que meyor trata al nuesu país.
Crusader Kings II y el Reinu de los Ástures
Crusader Kings II ye igualmente complexu. Ye otru xuegu de Paradox, como Europa Universalis IV, pero centráu nuna dómina histórica estremada. Nun hai que ser mui llistu, viendo’l títulu del xuegu, p’aldovinar cuála ye: Les cruzaes. Pente tolos reinos que se puen escoyer pa xugar, el Reinu de los Ástures ye un d’ellos, que tendrá qu’enfrentase a les invasiones de les fuercies musulmanes nel sur y negociar colos demás países europeos les condiciones d’una alianza o d’un sofitu internacional. Equí, a diferncia de n’Europa Universalis IV, podemos direutamente escoyer el Reinu de los Ásturies (esto ye, nun tenemos que lu “independizar” primero de nenguna Corona de Castiella como pasaba nel Europa Universalis IV), pos daquella yera un suxetu independiente.
El mod del civilization V “Spanish Civilizations: Leon-Galicia-Asturias”
El Civilization V ye la versión “pa dummies” del Europa Universalis IV. Un xuegu que tien delles diferencies col primeru amás del frechu de ser munchu menos complexu: Permítenos esplorar una cantidá d’años enforma mayor que l’Europa Universalis IV, que namás mos dexa ver la Edá Moderna. Nel Civilization V (Y en cualquiera de los qu’hebo primero d’él), podemos dir dende la Edá de Piedra hasta’l futuru próximu, ensin escaecenos de la Edá Industrial o’l Renacimientu. Nesti xuegu les carauterístiques de les civilizaciones simplifíquense nun líder, un par de carauterístiques económiques o militares, un edificiu únicu y una unidá única.
¿Y apaez Asturies? Lo cierto ye que non. Si merques el Civilization V con toles espansiones vas acabar deceicionáu o deceicionada al ver qu’Asturies nun ta na llista. Sicasí, hebo dalgún home o muyer de bona fe que fixo un mod pa meter a Asturies nel xuegu y, yá de pasu, tamién a Galicia y a Llión.
Nel casu d’Asturies la unidá especial llámase “Xinete” y l’edificiu especial llámase “Torrixón”. Amás del usu del asturianu nestes dos unidaes, el mod emplega (parcialmente) la toponimia asturiana y les trés primeres ciudaes que construyes (a nun ser que-yos pongas otru nome) van ser, n’orde, Uviéu, Pravia y Xixón. La parte bona que tien esti mod, a diferencia de los otros xuegos que comentemos, ye que ye posible xugar con Asturies (Y con Llión, y con Galicia) non solo na dómina medieval, sinón tamién na contemporánea. Eso sí, les unidaes y la historia amás del lider (Que nel nuesu casu ye Alfonso II), tán pensaes pa la dómina medieval. Nun hai tovía nengún mod pal Conseyu Soberanu d’Asturies y Llión.
Attila Total War: Age of Charlemagne
Pero… ¿Qué tien que ver Atila con Asturies? ¡Si Atila nun llegó a Asturies! Pos tien que ver que nel Attila Total War, hai una espansión que ye “Age of Charlemagne” que mos lleva al tiempu de Carlomagno, el rei francu que, según les cróniques, yera bon aliáu del Rei Alfonso II d’Asturies. Nesti xuegu vamos tener que remanar el Reinu Ástur (y van yá…?) na alta Edá Media non solo a nivel estratéxico (como pasare hasta agora colos de Paradox) sinón, tamién, a nivel táuticu. Nel Attila Total War la pantalla alterna ente la xestión del imperiu y la xestión de les tropes nel terrén.
Nesti casu, a diferencia de nos precedentes, nun ye namás que podamos xugar con Asturies. Sinón qu‘Asturies ye una de les poques (8 en total) naciones xugables; polo que, pel momentu, ye Attila Age of Charlemagne, el xuegu que más y meyor trata a Asturies de toos (anque non el que más se documenta, que ye EUIV, como diximos enantes).
Dellos errores y dellos aciertos
Una de les coses más llamatives de toes – sobre manera al tener en cuenta que son xuegos históricos – ye’l ver la bandera que diseñó Xovellanos, allá a entamos del sXIX, unos añinos depués de que los Estaos Xuníos s’independizaren coles barres y les estrelles… ...representando a un reinu medieval nel qu’esta enseña nun esistió (o, polo menos, non d’esa forma). Lo qu’amuesa que l’esfuerzu pa esplorar y documentase foi probetayu, si bien nel casu del Europa Universalis IV sí vimos que-y dan importancia a les Cortes y a la propia llingua llionesa.
Vemos, repasando’l conxuntu, qu’Asturies interesa y muncho nel so aspeutu medieval. Anque d’un xuegu a otru cométense los mesmos errores (toponimia deturpada, emplegu de la bandera anacrónica… etc.); pero sí qu’entienden munches otres coses: como qu’Asturies y Llión formen (o formaben) una unidá cultural, que tenemos llingua propia y una historia específica.
¿Puen facese xuegos ambientaos dafechu n’Asturies?
Equí hai dos opciones. D’una banda, que los estudios de videoxuegos asitiaos n’Asturies emplegaren a Asturies por escenariu y que les grandes compañíes “descubrieren” el potencial narrativu que tien Asturies non solo a nivel históricu del Reinu de los Ástures, sinón, na dómina contemporánea gracies a coses como la Revolución Asturiana, la Guerra Civil, Mayu de 1808 y, en definitiva, cualquier trama actual que tenga Asturies por escenariu. ¿Razones? Nun falten. Homes y muyeres del mundu enteru nun tuvimos problema dalu en xugar a un Fallout New Vegas ambientáu en Las Vegas (por más que’l 99% de la población nun pisare la ciudá na vida), nin tuvo problema Ubisoft, una empresa francesa, n’ambientar el Watch Dogs 2 en San Francisco o el Watch Dogs Legion en Londres. La xente diba xugar videoxuegos ambientaos n’Asturies del mesmu mou que xugamos a videoxuegos ambientaos nel Caribe, en París o en Massachussets.
Idees:
- Un Kingdom Come: Deliverance ambientáu na corte d’Alfonso II.
- Un Red Dead Redemption/GTA de mundu abiertu en 1920.
- Un simulador a lo The Sims, pero con cases d’indianos.
- Un xuegu de xestión de compañíes mineres y ferrocarril nel sieglu XIX.
- Un Battlefield 1934.
- Call of Duty: Operación Mazucu
- Un RPG medieval-fantásticu con elementos mitolóxicos astures y en llugares y ciudaes pre-romanes.
- Un Last of Us en Llanes
- Un videoxuegu de Los Fugaos, onde facer misiones, consiguir comida y bales…
- Un Assassin’s Creed nel que salga Xovellanos y tengamos qu’asesinar a diputaos de les Cortes de Cádiz.
- Un Fallout New Cuenques, onde Asturies tea con radiación y cuasi vacía de xente.
Y hasta equí’l nuesu reportaxe sobre Astuies nos videoxuegos. Bien ceo vamos intentar facer ún igual d’estensu de los Videoxuegos n’Asturies.
