El Sindicatu d’Autores de los Estaos Uníos, y diecisiete autores a títulu personal, denuncien a OpenAI, empresa creadora de ChatGPT, por utilizar les sos obres suxetes a derechos d’autor pa “entrenar” los sos programes d’intelixencia artificial. Ente los escritores alcuéntrense George R. R. Martin, autor de l’archiconocida saga Game of Thrones; John Grisham, autor de suspense del qu’adautaron hasta diez noveles al cine; George Saunders, Jonathan Franzen…
Na demanda consideren qu’OpenAI “copió les obres de los demandantes al por mayor, ensin permisu nin consideración” pa xenerar testos con apariencia humana, y qu’asina ta usándose pa xenerar noveles de mala calidá que depués puen vendese en formatu ebook, y inclusive diose’l casu d’emplegar ChatGPT pa facer fanfics (esto ye, obres non oficiales) del mundu de Game of Thrones.
D’esta manera, les quexes d’autores que vienen asociediendo dende va un tiempu, anque pueque sobre manera no que ye la xeneración d’imáxenes, escomiencen a tomar forma en procesos xudiciales, y queda por ver ónde acaba esto. En casu de qu’esta demanda saliera p’alantre y se considerara qu’esti ye un usu ilícitu de les obres, podemos dar por seguro qu’al crear xurisprudencia va pasar lo mesmo con otros programes, yá seya de xeneración de testos, imáxenes o videos. Conque toca preguntase, ¿podríen sobrevivir estos programes, dar resultaos con un mínimu d’apariencia de productos fechos por seres humanos, de deprender namás con productos de dominiu públicu? Nun tien pinta, y quiciabes la salida seya pagar drechos a los autores que quieran poner les sos obres a disposición del “entrenamientu”.
