Gamera ñació en 1965 pa intentar competir col en verdá inigualable Godzilla, y masque nunca nun llegó a tener la so fama, tampoco ye que lo ficiera dafechu mal. Esta tortuga xigante esfrutó de nada menos qu’una docena de películes (tamién cómics y abondos videoxuegos), pero nunca nun llegó a trescalar nel mercáu internacional como’l dinosauriu radioactivu y va yá bastantes años (exautamente dende 2006) que nun tenemos nengún proyeutu cinematográficu d’esti monstruu.
Por suerte, Netflix anunció va unos meses (contémosvoslo equí) que taba preparando una serie d’animación de la creatura, faciéndose asina colos drechos pa sacar al empar productos de los dos kaiju más famosos del mundu (recordemos les películes d’animación que sacó de Godzilla, asina como la serie de 2021 na que reimaxina a esti y a otros monstruos de la franquicia, Godzilla: Singular Point). D’aquella nun desvelaben muncho, pero va unos díes asoleyaron un avance de la serie que la verdá que resulta espectacular, y con una galería de monstruos enemigos que ye ablucante. Cómo non, dexámosvos calcando equí.
La serie va constar de seis episodios (bono, que sepamos, pos esto ye lo que va durar la primer temporada) y estrénase yá en nada, el siete de setiembre. Nun sabemos tovía si va siguir la continuidá de dalguna de les sagues de películes, anque lo más probable ye que, magar que’l nome indique lo contrario, seya un reiniciu que nun les tenga en cuenta p’atrayer el mayor públicu posible.
Quédanos por suañar, agora que ye posible al tener Netflix la capacidá pa ello, ver por fin un enfrentamientu ente Godzilla y Gamera.
