La segunda película d’animación de Miles Morales, Spider-Man: Across the Spider-Verse, tien un avance nuevu nel que nos desvelen un montonáu de coses que vamos poder ver na película, y, como nun vos sotituláremos tovía nengún de los trailers, dende Refuelgu y por pidimientu popular trayémosvos esti. Podéis velu yá na canal de YouTube que tenemos pa ello, namás calcando equí.
Continuación de Spider-Man: Into the Spider-Verse, la película d’animación de 2018 (ganadora d’un Oscar) ye la que traxo a los cines a Miles Morales, el Spider-Man afrollatinoamericanu que ñació nos cómics de la llinia Ultimate. Esta segunda parte afonda en presentanos los munchos mundos homes-araña alternativos, repitiendo dalgunos de la pasada, como Spider-Gwen o un Peter apaisanáu, al empar que nos presenta otres decenes como Spider-Man 2099, personaxe popular nos cómics de los años noventa y quien, como podemos ver nel avance, va xugar un papel bien importante. Dambes dos películes destaquen pol usu d’abondos estilos d’animación al empar asina como poles metarreferencies, que van dende los cómics hasta los memes del personaxe.
