Va un par de meses (equí) contábemosvos que Netflix tien ente manes un especial de la franquicia noventera, Power Rangers: Once & Always, nel que volveríen a axuntase los Rangers orixinales. Bono, o pelo menos unos cuantos d’ellos, yá que ta confirmada la vuelta de los Power Rangers Azul y Negru de la primer fornada, asina como de los primeros sustitutos (el Coloráu, el Negru y la Mariella, llegaos tan pronto que protagonizaron tamién la película, y la un poco más tardiega Rosa). Tamién vamos ver a la xoven actriz Charlie Kersh presentándose nel papel de la fía de la Power Ranger Mariella orixinal (de la que l’actriz finó va venti años nun accidente de coche), y de la qu’agora sabemos que va buscar venganza porque la malvada archienemiga de los Rangers, Rita Repulsa, mató a so ma. La villana va volver pa dar guerra, claro, anque agora nun cuerpu robóticu.
Y ye qu’esto acabamos de sabelo porque hai, por fin, un avance acabante salir del fornu, nel que podemos echar una güeyada a lo que nos espera. Podéis, por supuestu, velu calcando equí. Hai rumores de que podríen salir otros Power Rangers de manera sorpresiva, como’l Coloráu orixinal o inclusive’l Verde (que llamentablemente se suicidó va unos meses, pero dempués de que se rodara l’episodiu), anque, como dicimos, son namás rumores.
Mighty Morphin’ Power Rangers foi una adautación al mercáu americanu de les series xaponeses Super Sentai, usando les sos escenes d’efeutos especiales, superhéroes amazcaraos, monstruos y robós xigantes, pero cambiando’l guión y les escenes más cotidianes poles d’actores norteamericanos. Tuvo un gran ésitu, con dos películes orixinales estrenaes en cines, y tiénenlo tamién les sos socesores, pos hasta anguaño sigue adautándose la franquicia y, dacuando, dalgún de los actores orixinales apaez como convidáu especial nes series nueves. L’especial estrénase yá en nada, el diecinueve d’abril.
