Magar que James Cameron paez tar enfotáu en siguir faciendo películes d’Avatar, teniendo planiao sacar nada menos qu’otres trés d’equí a 2028, nun quier quedar neso y quier esparder la franquicia per otros medios.
Per un llau, yá va años que s’anunció’l desendolcu d’un videoxuegu de mundu abiertu que, como pasó cola segunda película, ta faciéndose de rogar. Por embargu, hai rumores potentes de que taría por fin a puntu d’anunciase la fecha d’estrena, pudiendo salir a la venta nunos meses de nada. Llámase Avatar: Frontiers of Pandora, y yá más d’un añu que van dexando ver qué nos espera nél con videos como’l que vos dexamos calcando equí. Según cuenten, la hestoria del videoxuegu va ser canon, colo qu’amás de pasalo bien va permitir conocer más de Pandora y los sos habitantes.
Per otra parte, la editorial Dark Horse Comics, que lleva yá dél tiempu sacando cómics de la franquicia, espublizó va unos meses el cómic Avatar: The High Ground, una serie curtia basada nel guión de lo que James Cameron tenía planiao que fora la segunda parte d’Avatar, pero qu’acabó dexando pa prau y pasando direutamente a lo que pensara facer na tercera. El productor Jon Landau cuenta qu’usaron el guión a nivel internu, pa que los actores entendieren meyor los sos personaxes, y que la idea ye siguir cola mesma continuidá nos cómics pa facer con ellos un universu espandíu.
El casu ye qu’Avatar: The Way of Water tien recaldao más de dos mil trescientos millones nos cines, volviéndose la tercer película más esitosa de la historia, y el mercáu nun va desaprovechalo. Ta claro que vamos tener más productos de la franquicia en bien poco.
A estes, va un tiempu que sotitulamos al asturianu l’avance de la película, y si tovía nun lu vistis tenémoslu calcando equí.
