Como anunciemos nel so momentu, consagramos esti mes d’agostu a facer una serie d’entrevistes posaes con muyeres asturianes de menos de 40 años que tán actives nel campu de la lliteratura y la cultura asturianes pa entruga-yos por qué entá nun hai igualdá nesi campu y les muyeres siguen siendo una minoría ente les persones que publiquen obra.
Güei entrevistamos a Aymara González Montoto, traductora profesional, ganadora del Pepe Campo de Monólogu n’asturianu y que ta traduciendo anguaño la obra d’autores como C.S. Lewis o Stephen King.
Hay una desigualdá nel númberu de muyeres y homes con obra publicada n’asturianu. ¿Por qué pienses que pasa eso?
Pasa lo mesmo equí, na lliteratura, que nel restu l’ámbitu cultural. Hai desigualdá porque vivimos nun sistema desigual nel que se premia perpetuar la desigualdá. Si pa qu’un escritor pueda escribir necesita que la so muyer atienda la casa y la familia, o necesita contratar a una persona pa que s’encargue de llimpiar (seutor, por ciertu, perfeminizáu) y nun vemos un problema, ¿cómo vamos reflexonar lo más mínimo en que gran parte de les novedaes editoriales n’asturianu tán escrites por homes?
¿Onde crees que ta l’orixe de la desigualdá? ¿Nel númberu de muyeres qu’escribe en rellación a los homes qu’escriben, o nel númberu de muyeres que publiquen en rellación a los homes que publiquen?
La desigualdá naz del patriarcáu que mamamos toos y toes dende que nacemos. A les muyeres enséñennos a ser dóciles, obedientes, sumises, humildes; mientres qu’a los rapazos, dende la escuela, incúlquen-yos que ye bono ser atrevíos, valientes y líderes. Pa escribir hai qu’amosase en público y exponese a la crítica, tanto bona como mala. Lóxicamente, si quiero que la mio novela reciba, sobre manera, pallabres amables, voi mirala, permirala y correxila; voi ser perfeicionista y nun voi mandar dengún testu que nun me convenza.
“Pa escribir hai qu’amosase en público y exponese a la crítica, tanto bona como mala.“
Esi nun tien por qué ser el casu de los mios compañeros escritores. Si t’enseñen dende pequeñu que namái escribes una novela, ye bona cosa mandalo a una editorial, al marxe de si’l testu debe revisase o reestructurase, ¿por qué nun me van publicar? Sedría fácil pensar que quien nun publica ye porque nun quier.
Creo que parte del problema ta na educación diferenciada por xéneru, qu’afeuta n’especial a les muyeres y el coleutivu LGBTIQ+, y parte na falta de crítica pa cola situación. Si yo soi un home publicáu que nunca tuvo gran problema p’asoleyar poemes, ensayos o noveles, ¿ónde voi ver la desigualdá, si nun la vivo?
Anque non n’asturianu, hai estadístiques n’otres lliteratures que dicen que les muyeres lleen tanto a homes como a muyeres pero los homes nun lleen a les muyeres. ¿Date la impresión de que ye asina nel casu asturianu? ¿Por qué?
Dafechu. Yo, como muyer llectora, propúnxime va tiempu lleer tolo más a muyeres publicaes na mio llingua, y ye una xera mui cansada. Les noveles escrites por muyeres tán o descatalogaes o son complicaes d’atopar, mientres que llibros escritos por homes salen lo menos 5 cada trimestre: nun hai que matase pa llegar a ellos.
N’otros mercaos más grandes hai catálogu enforma pa poder esbiyar según los intereses, la representación de coleutivos y el xéneru de quien escribe; tengo que confesar qu’ehí aprovecho pa compensar el déficit n’asturianu d’otres perspeutives non masculines y lleo muncho menos a señoros. Podría dicir que’l 90% de lo que lleo anguaño ta escrito por muyeres o xente del coleutivu LGBTIQ+. Fai años yera al revés, porque nun me parara a pensar na sobrerrepresentación y na saturación masculina del ámbitu editorial. Lo mesmo d’enantes: si nun te pares a pensar na custión, ¿por qué vas ver un problema nin pensar en cómo llegamos ehí?
Nel to casu, ¿qué ye lo que más te frenó de cara a escribir o a publicar? ¿Qué eches en falta?
Echo munchísimo en falta ver muyeres na lliteratura asturiana, escribiendo y protagonizando. Poder deprender d’elles, de les sos esperiencies, ver cómo volcar na mio llingua el mio país, tal como lu viven.
Nel mio casu, échame p’atrás, a la d’escribir, la falta de tiempu. Nunca topo’l momentu de sentame, tranquilamente, y poder poner la cabeza a desendolcar trames, personaxes y xiros argumentales; dexalo dieldar ensin que pasen meses porque surden oportunidaes llaborales o d’estudios y, de golpe, la cabeza entra en bucle y tien qu’escoyer ente lo urxente y lo importante.
¿Por qué te paez que, inclusive en concursos con paridá home-muyer nos xuraos, sigue pasando que mayoritariamente ganen homes?
Ún, porque pue que nun heba tantes propuestes escrites por muyeres, ¿quién tien tiempu? Y dos, anque heba paridá de xéneru nos xuraos, ¿qué abunda más n’asturianu? ¿A quién lleemos davezu? Eso, seya home o muyer, inflúi nos mios gustos, condicióname. Si mandaran agora una novela del estilu de Louisa May Alcott o Joanna Russ al Xosefa Xovellanos, ¿sedríamos p’apreciala polo que val?
¿El llibru escritu n’asturianu que más te prestó escritu por una muyer?
Cuentos de ser y de tar, de Laura Marcos, porque enseñóme que ye posible tener una voz propia, pulida y cuidada con perspeutiva femenina y feminista na narrativa. Orfandá, de Marta Mori y P’anular los adioses, de Lourdes Álvarez, por espresar el dolor, la perda y l’arrenunciu de manera cruda y valiente. Y tolo que lleí de Blanca Fernández, porque ye una collacia a la qu’almiro y, al ser de la mesma xeneración, compartimos intereses poles mesmes temátiques.
¿Qué te paez que pueden facer les editoriales pa iguar esta situación?
Poner la igualdá ente les sos prioridaes. Ser consciente del problema nun ye más qu’un pasu hacia la igualdá, el primeru: si detrás nun vienen más, apaga y vámonos. Hai editoriales asturianes de poesía que quieren tener un catálogu paritariu y son mui crítiques coles obres que-yos lleguen. Si tienen qu’asoleyar un llibru más tarde por sacar enantes el d’una muyer, nun tienen problema.
Hai tamién que falar con arguyu de los nuesos posicionamientos políticos y estratéxicos, y tener capacidá crítica. Pa ser feminista o aliáu/da LGBTIQ+ nun ye tan importante saber muncho, como tener xeitu, paciencia, ¿por qué non? humildá y valor p’aceutar que nun conocemos la verdá universal. Tenemos muncho por deprender y nun pasa nada, al revés, reconocelo hónranos y fai que llectores y escritores perciban esos espacios como seguros.
¿Y los poderes públicos?
Oficialidá, porque garantizar los derechos de la sociedá asturfalante ye esencial pa que les muyeres puedan espresase na so propia llingua y tengan más oportunidaes y representación. Promover el conocimientu de muyeres escritores: reeditales, dedica-yos selmanes de les lletres y otros momentos nel calendariu asturianu, difundir investigaciones y estudios sobre la so obra, ente otres coses. Tamién podríen promoverse grupos d’alderique femenín y feminista dende los conceyos, grupos de llectura dende les biblioteques, concursos lliterarios onde heba sensibilidá pa col tema o se valore la so representación. Crear residencies…
Nun sé, que piensen tamién dende les altes esferes cómo faen por perpetuar la desigualdá y que si tienen que dedicar recursos y facer daqué, nun quede pa prau. Como siempre.
Tamién podríen promoverse grupos d’alderique femenín y feminista dende los conceyos, grupos de llectura dende les biblioteques, concursos lliterarios onde heba sensibilidá pa col tema o se valore la so representación. Crear residencies…
¿Vivisti dalgún tipu de discriminación como autora n’asturianu pol fechu de ser muyer? ¿Cuála?
Discriminación direuta y manifiesta non, porque esti ye un país pequeñu onde tol mundu trata con tol mundu, cuidámonos muncho de la crítica y l’ataque personal, pero sí micromachismos. Hai autores a los qu’almiro y tengo munchu ciñu que se ven etiquetaos como “de perspeutiva universal” cuando, nes sos páxines, puedo dame cuenta que lleo a un home blancu, de clas media, cis y hetero. ¿Aú les muyeres nesa universalidá? ¿Y la xente racializao? ¿Y el coleutivu LGBTIQ+? Paez mentira qu’a estes altures definamos con esos términos y nun nos demos cuenta que, pel camín, dexamos fuera a más de la mitá de la población mundial.
