Si n’artículos anteriores falábemos del fenómenu de los idols en Xapón, güei venimos a falavos d’un grupu d’idols perespecial pola so anovación nun xéneru musical perconocíu: el metal. El grupu del que vamos falar nómase Babymetal, y les sos canciones tán na llende del heavy metal y el j-pop.
Seya pola estética carauterística del grupu (faldes de metros y metros de tul cortes con cueru y estética más tradicional), poles coreografíes o pola voz de la cantante, l’ésitu del grupu ye ablucante y l’anovación que traxeron al xéneru nun paez que vaya parar.
Elles fueron el primer grupu asiáticu n’algamar el primer puestu nel Billboard Rock, y la so música ta reconocía por dellos grupos llexendarios del xéneru. Dafechu, fueron teloneres de Metallica y actuaron con Rob Halford (vocalista de Judas Priest) nos Alternative Press Music Awards, col qu’interpretaron “Painkiller” y “Breaking the Law”.
Pola so estética idol y les sos coreografíes son criticaes polos más conservadores de los xéneros musicales que toquen, pero nun-yos falten defensores y siguidores que les sofiten.
Yá ficieron xira per Europa varies vegaes, y teníen pensao actuar en 2020 per primer vez n’España, nun conciertu dientro del Route Resurection (organizáu polos mesmos que’l Resurection Fest de Galicia), pero cola pandemia’l conciertu suspendióse y entá nun se sabe si nun futuru volverán.
L’orixe: un grupu d’idols anovador
El grupu entamó a desendolcase dientro del proyectu Sakura Gakuin de la discográfica Amuse en 2010. El Sakura Gakuin ye un macrogrupu d’idols que va cambiando les sos integrantes, porque solo puen formar parte d’él demientres que tán na secundaria (qu’en Xapón fina a los 15 años). Dientro d’esti grupu hai subgrupos que toquen distintos xéneros musicales, y ún d’estos grupos foi Babymetal.
Babymetal taba formáu orixinalmente por tres moces: la cantante principal Su-metal (Suzuka Nakamoto), Moa-metal (Moa Kikuchi) y Yui-metal (Yui Mizuno), éstes dos últimes apoyu de baile y de coros. Sicasí, Yui-metal dexó’l grupu en 2018 por problemes de salú y agora solo tán les dos primeres como miembros oficiales. Cuando se fizo’l grupu Su-metal tenía 12 años y Moa-metal y Yui-metal 10 años. Cuando Su-metal cumplió 15 años y tuvo que dexar Sakura Gakuin, Babymetal pasara a ser un grupu independiente.
Los sos trabayos
La primer canción como grupu llámase “Doki Doki Morning”, una canción con coreografía idol incluyida entemecía con música rock. Esta primer canción ye de les más suaves que tienen, por dicilo de dalguna manera, yá qu’a partir d’esta el grupu tiró más al heavy metal que tanto lu carauteriza, como pasa con dalgunes como “Headbangeeer”. Otra de les canciones primeres qu’hai que destacar ye “Megitsune” (que tien 73 millones de visites solo en Youtube), y tres d’ésta vien ésitu tres otru, como “Gimme chocolate!”. Toes estes recuéyeles l’álbum Babymetal, que s’asoleyó per primer vez en 2014 y tien varies reediciones.
En 2016 asoleyen l’álbum Metal Resistance, que ye’l qu’inclúi otru de los éxitos más conocíos del grupu, “Karate”, qu’interpreten nos sos conciertos xunto a canciones del anterior álbum.
L’últimu álbum qu’asoleyen ye Metal Galaxy en 2019, yá ensin Yui-metal, nel que llanzaron canciones como “PA PA YA”, “Distorsion”, “Oh Majinai”, collaborando con grupos como Sabaton y Arch Enemy. Esti ye’l que más estilos de música fusiona y el meyor valoráu pola crítica. Nos conciertos ocupa’l puestu de Yui-metal otra idol perconocía, Riho Sayashi, sicasí nun ye miembru oficial del banda (lo que dexa esperanza de que nun futuru pueda volver Yui-metal),
Lo último que sabemos ye que n’ochobre d’esti añu van asoleyar un álbum nuevu que se va llamar 10 Babymetal Budokan.
